सोल्टिनी लिएर आए सुसन साम्सोहाङ

-- / प्रकाशित मिति : आइतवार, साउन १६, २०७३

काठमाडौं— लिम्बु भाषा गीतहरुका लोकप्रिय गायक सुसन साम्सोहाङ लिम्बुले गाएका नेपाली लोक–आधुनिक गीतहरुको एल्बम ‘सोल्टिनी’ लाई गायक राजेशपायल राईसहितको व्यक्तित्वले काठमाडौंमा विमोचन गरेका छन् । मण्डला थिएटरमा आयोजित एक सांगीतिक समारोहमा संगीतकार राजु सिंह, गायक सत्यराज आचार्य, व्यंग्यकार मनोज गजुरेल तथा एमाले नेता योगेश भट्टराईसहितको समुहले यो एल्बम विमोचन गरेको हो ।
१४ वर्षअघि नै धरानमा संगीतकर्मी ओमप्रकाश राईसंग संगीतको औपचारिक प्रशिक्षण लिएर सांगीतिक क्षेत्रमा उदाएका गायक सुसन साम्सोहाङले ‘सोल्टिनी’ एल्बममा पाँच वटा गीत समावेश गरेका छन् । संगीतकर्मीहरु गुरुदेव कामत, कैलाश राई तथा चण्डीप्रसाद काफ्लेका यी चेला लिम्बु भाषाका गीतहरुका लोकप्रिय गायक समेत हुन् ।

तीन वर्षअघि ‘सुसन’ शीर्षकको एल्बममार्फत नेपाली सांगीतिक क्षेत्रमा डेब्यू गरेका सुसनले ‘सोल्टिनी’ एल्बमका गीतहरुमा हरी लम्साल, उत्तमराज लिम्बु, खेमराज गुरुङ, विक्रम थापा तथा आफ्नै संगीतका गीत गाएका छन् । नरेश भट्टराई, उत्तमजंग थापा, खेमराज गुरुङ, सन्तोष मादेन तथा रमेश अधिकारीले एल्बमका गीतहरु रचना गरेका हुन् ।
ताप्लेजुङका यी गायकको एल्बम विमोचन समारोहमा उपस्थित उनकै गाउँले व्यंग्यकार मनोज गजुरेल तथा नेता योगेश भट्टराईले एल्बमका गीतहरुको सफलताको शुभकामना दिए । समारोहमा गायक सत्यराज आचार्यले एल्बमका गीतहरुको समिक्षा गर्दै पूर्वेली भाकाका गीतहरुको एल्बमले स्रोताको मन जित्ने दावी गरे । प्रमुख अतिथिको रुपमा गायक राजेशयाल राईले पनि गायक सुसनको गायनको प्रसंसा गर्दै थप मेहनत गर्ने सुझाव दिए ।
समारोहमा एल्बमको शीर्षक गीत ‘सोल्टिनी’ को म्युजिक भिडियो प्रिमियर गरियो । यूगल पोमुद्वारा निर्देशित उक्त भिडियोमा पार्वती राई तथा धर्मेन्द्र आचार्यले अभिनय गरेका छन् ।
एल्बममा ‘सोल्टिनी’, ‘गाँसौंला आज…’, ‘यो मीठो’, ‘बैंशको बेलामा’ तथा ‘हिमाल राम्रो’ शीर्षकका गीत समावेश छन् । ‘हिमाल राम्रो’ यूगल गीत हो, जसमा गायक सुसनलाई गायिका झुमा लिम्बुले साथ दिएकी छिन् ।
रुबुशा क्रिएसन वक्र्सले यो एल्बमको बजार व्यवस्थापन गर्नेछ ।