काठमाडौं– सर्वोच्च अदालतले आफ्नो अवहेलना भएको मुद्दामा अनसनरत वरिष्ठ चिकित्सक डा. गोविन्द केसीसँग मंगलबार बयान लिएको छ । सर्वोच्च अदालतमा बयान दिने क्रममा डा.केसीले सञ्चारमाध्यममा आफूले दिएका अभिव्यक्तिलाई अदालतको अवहेलना भन्न नमिल्ने जिकिर गरेका छन् ।
डा।केसीले न्यायालयको अपमान र मानहानी गर्नै कुनै उद्देश्य नभएको, यद्यपि गलत क्रियाकलापको विरुद्ध भने आफू लडिरहने बयानमा उल्लेख गरेका छन् ।
डा.केसीले अदालतको अवहेलना आफूले नभई प्रधानन्यायाधीशबाटै भएको बयान दिएको अधिवक्ता सुरेन्द्र भण्डारीले जानकारी दिएका छन् । बयान सकिएपछि न्यायाधीशद्वय ओमप्रकाश मिश्र र केदारप्रसाद चालिसेको संयुक्त इजलाशमा सुनुवाइ भैरहेको छ । डा.केसीका पक्षबाट वरिष्ठ अधिवक्ता कृष्णप्रसाद भण्डारी, दिनेश त्रिपाठी, अधिवक्ता सुरेन्द्र भण्डारी तथा लेखनाथ न्यौपानेले बहस गर्दैछन् ।
डा.केसीले त्रिवि चिकित्सा शास्त्र अध्ययन संस्थानका डीनमा प्रा. डा. शशि शर्मालाई पुनःर्बहाली गराउने अदालतको आइतबारको फैसलाको विरोधमा प्रधानन्यायाधीश गोपाल पराजुलीको राजीनामा माग गरी अनशन थालेका थिए । उनलाई सोमबार साँझ अनशनस्थल त्रिवि शिक्षण अस्पतालबाट प्रहरीले पक्राउ गरी हिरासतमा राखेको थियो ।