काठमाडौं– आज आईतबार प्रदेश २, ५, ६ तथा ७ को पहिलो प्रदेशसभा बैठक प्रारम्भ भएको छ । आज बसेका चारवटै प्रदेशको बैठकमा प्रतिनित्वि गर्ने सबै दलका प्रतिनिधिले मन्तव्य राखेपछि सभा सञ्चालको अन्तरिम कार्यविधि २०७४ पारित गरिनेछ । बैठकले सभामुख र उप–सभामुख चयनको मिति पनि निर्धारण गर्नेछ ।
प्रदेश २ को जनकपुर, ५ को बुटवल, ६ को सुर्खेत र ७ को धनगढीमा बैठक प्रारम्भ भएको हो ।
प्रदेश नम्बर २ को बैठक प्रारम्भ हुनासाथ राजपाका सांसदहरुले मधेस आन्दोलनमा मृत्यु भएका सहिदको तस्बिर नराखिएको भन्दै विरोध गरेका छन् । उक्त बैठकको अध्यक्षता ज्येष्ठ सदस्य लगन चौधरीले गरेका छन् ।
प्रदेश ५ को बैठकको अध्यक्षता ज्येष्ठ सदस्य बलराम शर्मा पौडेलले गरेका छन् । अपराह्न्न १ बजे सुरु भएको उक्त बैठकमा दलका प्रतिनिधिहरुले आफ्नो धारणा प्रस्तुत गर्ने क्रम जारी रहेको बताइएको छ ।
प्रदेश ६ को पहिलो प्रदेशसभा बैठकको अध्यक्षता ज्येष्ठ सदस्य हिमबहादुर शाहीले गरेका छन् भने प्रदेश नम्बर ७ को पहिलो बैठकको अध्यक्षता ज्येष्ठ सदस्य दिव्येश्वरी शाहले गरेकी छन् ।