काठमाडौं– नेकपा एमाले र नेकपा माओवादी केन्द्रबीच पार्टी एकिकरणको विषयमा सात बुँदे सहमति भएको छ । गए राति अबेर सम्पन्न सहमति अनुसार एकिकृत पार्टीको नाम नेपाल कम्युनिष्ट पार्टी राख्ने सहमति पनि भएको छ ।
सहमति दअुसार पार्टीको मार्गनिर्देशक सिद्धान्त माक्र्सवाद लेनिनवाद हुने भएको छ । सहमति पत्रमा एमालेका चार र माओवादीका तीन नेताले हस्ताक्षर गरेका छन् ।

एमालेले अपनाउँदै आएको जनताको बहुदलीय जनवाद अन्तर्गत अवलम्बन गरेको शान्तिपूर्ण बहुदलीय प्रतिस्पर्धामार्फत् आफ्नो श्रेष्ठता स्थापित गर्ने लगायतका मान्यता र शान्ति सम्झौता र त्यसपछिका लोकतान्त्रिक अभ्यासद्वारा माओवादी केन्द्रको पनि उक्त शान्तिपूर्ण बहुदलीय प्रतिस्पर्धामार्फत् आफ्नो श्रेष्ठता स्थापित गर्ने लगायतका मान्यतामा समान धारणा रहेको स्पष्टै छु, सहमतिको तेस्रो बुँदामा भनिएको छ ।

एमालेको जबज र माओवादी केन्द्रको माओवाद र एक्काइसौँ शताब्दीको जनवाद सम्बन्धी विषयहरुमा विधिसम्मत छलफल गरी आवश्यक परिमार्जन र विकास गर्न सकिने तथा उक्त आधारमा टेकेर अन्तरिम राजनीतिक प्रतिवेदन एवं अन्तरिम विधान तयार पारी सोहीअनुसार एकीकृत पार्टी सञ्चालन गर्ने सहमतिमा उल्लेख गरिएको छ ।

यस्तै प्राप्त उपलब्धिहरुको रक्षा र विकास गर्दै राष्ट्रियता, लोकतन्त्र र सामाजिक न्याय सुदृढ गर्दै सामाजिक आर्थिकरुपान्तरणमार्फत् समाजवादको आधार निर्माण गर्ने भएको छ ।
आगामी पार्टी महाधिवेशनलाई एकता महाधिवेशनका रुपमा समझदारीका साथ भव्यरुपमा सम्पन्न गरिने पनि सहमति भएको छ ।

सहमति पत्रमा एमालेअध्यक्ष केपी शर्मा ओली, बरिष्ठ नेताहरु झलनाथ खनाल, माधवकुमार नेपाल, उपाध्यक्ष वामदेव गौतम र महासचिव ईश्वर पोखरेल तथा केन्द्रका अध्यक्ष पुष्पकमल दाहाल, नेताहरु नारायणकाजी श्रेष्ठ र रामबहादुर थापाले हस्ताक्षर गरेका छन् ।
१७ असोजमा गठबन्धन घोषणा गरेर प्रतिनिधिसभा र प्रदेशसभा सदस्य निर्वाचनमा भाग लिएका यी दुई दलले झण्डै दुई तिहाई मत प्राप्त गरेको छ ।