काठमाडौं– गायिका बुनु श्रेष्ठ लामो समयपछि दर्शक तथा स्रोतामाझ आएकी छिन् । गायिका बुनु श्रेष्ठले भरखरै सार्वजनिक गरेको गीत ‘झिमझिम परेलीमा.’ को नयाँ स्वरुपले दर्शक तथा स्रोताको मन जित्न थालेको छ ।
कुनै बेला स्रोताले अत्यन्त रुचाएको ‘झिमझिम परेलीमा…’ मार्फत उनी हालै यूट्युबमार्फत दर्शकमाझ आएकी हुन् । दिवंगत संगीतकर्मी स्व.सुनिल वर्देवाले यो गीतलाई संगीतबद्ध गरेका हुन् । गायिका श्रेष्ठले यो गीत तथा भिडियोलाई वर्देवाप्रति नै समर्पित गरेको बताएकी छिन् । गीतमा गायिका श्रेष्ठकै शब्द सुन्न सकिन्छ । यो गीतको रेकर्डिङ कार्य स्टुडियो साउण्ड मिलमा चर्चित रेकर्डिष्ट महेश्वरमान राजभण्डारीले गर्नु भएको हो ।
भिडियोमा मोडल तथा अभिनेत्री एलिशा राईको आकर्षक नृत्य देख्न पाइन्छ । एलिशालाई साथीहरुले नृत्यमा साथ दिएका छन् । प्रशान्त तामाङले कोरियोग्राफी गरेको यो भिडियोको छायांकन रामशरण उप्रेती र मदन घिमिरेले गरेका छन् । नितिन चन्दको निर्देशनमा तयार भएको यो भिडियोलाई दिन्सोन शाले सम्पादन गरेका हुन् ।
भिडियोलाई स्टुडियो साउन्ड मिलले बजार व्यवस्थापन गरेको छ भने साउन्ड मिलकै आधिकारिक यूट्युब च्यानलबाट भिडियो सार्वजनिक गरिएको छ।

यस्तो छ ‘झिमझिम परेलीमा‘ को म्युजिक भिडियो