काठमाडौं– प्रतिनिधिसभा सदस्यहरु निर्वाचित भएको ४ महिनापछि आधिकारिक रुपमा सांसद भएका छन् । संघीय सांसदहरुको सपथ आइतबार सम्पन्न भएको हो ।
यस्तै, राष्ट्रियसभाका सदस्यहरु पनि चुनिएको एक महिनापछि मात्र आधिकारिक भएका छन् । सांसदहरुले शपथ लिएपछि मात्र राज्यबाट निर्धारित सुविधा लिन पाउँछन् । संघीय सांसदहरुले जेष्ठ सदस्यबाट शपथ लिएका हुन् । सांसदहरुको शपथअघि प्रतिनिधिसभाका ज्येष्ठ सदस्य महन्थ ठाकुर र राष्ट्रियसभाका जेष्ठ सदस्य तारादेवी भट्टलाई राष्ट्रपति विद्यादेवी भण्डारीले शपथ गराउनु भएको थियो ।
प्रतिनिधिसभाका सांसदहरुलाई जेष्ठ सदस्य ठाकुरले शपथ गराउनु भयो । प्रतिनिधिसभाका २ सय ७५ सदस्य मध्ये ४ जना बाहेक सबैको शपथ भएको छ । प्रतिनिधिसभधाको जेष्ठ सदस्य महेन्द्र राय शपथमा उपस्थित हुन भएन । माओवादी केन्द्रका टोपबहादुर रायमाझी र धर्मशीला चापागाई उपत्यका बाहिर रहेको कारण शपथमा सहभागि हुनु भएन । कैलाली क्षेत्र नम्बर १ बाट निर्वाचित टीकापुर घटनाका अभियुक्त रेशम चौधरीको शपथ भएन ।
राष्ट्रियसभाका ५९ मध्ये ५६ जनाले शपथ लिएका छन् । राष्ट्रियसभाका सांसदहरुलाई जेष्ठ सदस्य भट्टले शपथ गराउनु भयो । राष्ट्रियसभामा मनोनित अर्थमन्त्री डा.युवराज खतिवडा, रामनारायण बिडारी र डा बिमला पौडेल राईलाई सर्वोच्च अदालतको रोक आदेशको कारण शपथ भएन । संघीय संसदको पहिलो बैठक भोलि सोमबार बस्दैछ ।