काठमाडौं– त्रिभूवन अन्तर्राष्ट्रिय विमानस्थलमा सोमबार दिउसो यूएस बंगला एयरलाइन्सको विमान दुर्घटना भएको छ । यूएस बंगलाको फ्लाइट नम्बर बीएस–२११ को विमान अवतरणका क्रममा दुर्घटना भएको हो । बंगलादेशको राजधानी ढाकाबाट आएको विमान दुर्घटना भएपछि भीषण आगो लागेको थियो ।
पछिल्लो विवरण अनुसार विमान दुर्घटनामा ४९ जनाको मृत्यु भएको पुष्टि भएको छ । यसअघि दुर्घटना स्थलमा २८ जनाको शव संकलन गरिएको छ । ३१ जनाको उद्दार गरिएकोमा ८ जनाको मृत्यु भएको एसएसपी पूर्णचन्द्र जोशीले जानकारी दिएका छन् । मृतकको संख्या बढ्न सक्ने अनुमान प्रहरीको छ । घाइतेहरुको केएमसी, नर्भिक लगायतका अस्पतालमा उपचार भइरहेको छ ।
यसबीच यूएस बंगला एयरलाइन्सको विमान दुर्घटना भई लागेको भीषण आगो नियन्त्रणमा आएको छ ।
विमानमा ६७ यात्रु र चालक दलका ४ गरी ७१ जना सवार रहेको जनाइएको छ । दुर्घटनाग्रस्त विमानबाट अहिलेसम्म १४ जनाको मात्रै उद्धार गरिएको छ ।
बम्बाडियर–ड्यास क्यु ४०० सिरिजको जहाज दिउँसो २ः२० मा रेनवेबाट चिप्लिएको थियो ।
प्रत्यक्षदर्शीहरुका अनुसार सिनामंगलबाट हेर्दा दक्षिणबाट आएको विमान एक्कासी अवतरण नगरी कन्ट्रोल टावरलाई छोलाझैं गरी बाँयातर्फ मोडिएर दक्षिण लागेको थियो । फेरी विमान मोड्दामोड्दै पूर्व लागेर भुँइमा बजारियो ।
समान्यतयाः विमान उडानभन्दा अवतरणको क्रममा बढी संवेदनशील मानिन्छ । विमान पूर्णरुपमा क्षतिग्रस्त भएको छ ।