घट्ने भयो आर्थिक वृद्धिदर

-- नेपाली टाइम्स अस्ट्रेलिया ?>

काठमाडौं– विश्व बैंकले सन् २०१८ मा नेपालको आर्थिक वृद्धिदर ४ दशमलव ६ प्रतिशत हुने प्रक्षेपण गरेको छ । विश्व बैंकले आगामी दुई वर्षसम्म नेपालको आर्थिक वृद्धिदर अझै घट्ने जनाएको छ । विश्व बैंकका अनुसार सन् २०१८ मा ४ दशमलव ६ प्रतिशत हुने नेपालको आर्थिक वृद्धिदर सन् २०१९ मा ४ दशमलव ५ तथा २०२० मा ४ दशमलव २ प्रतिशतमा सिमित हुनेछ ।
यद्यपि सरकारले भने चालू आर्थिक वर्षमा ७ दशमलव २ प्रतिशत आर्थिक वृद्धि गर्ने लक्ष्य राखेको छ । गत वर्ष तराईमा गएको बाढी, घट्दो रेमिटेन्स तथा कर्जाको उच्च व्याजदरले वृद्धिदरमा असर गर्ने बैंकले जनाएको छ ।
नेपालमा प्रत्येक वर्ष ३५ हजारको हाराहारीमा काम गर्ने जनशक्ति बढिरहेको तथा त्यस अनुरुपको रोजगारी सिर्जना हुन नसकेको विश्व बैकले उल्लेख गरेको छ । उच्च आर्थिक वृद्धिदर हासिल गर्न प्रत्येक वर्ष दुई लाख ४० हजार रोजगारी सिर्जना हुनुपर्ने विश्व बैंकको भनाइ छ । एशियाली विकास बैंक एडीबीले यसअघि नै रिपोर्ट सार्वजनिक गरी नेपालको आर्थिक वृद्धिदर ४ दशमलव ९ प्रतिशत हुने जनाएको थियो ।