काठमाडौं– छोराको हत्यारालाई कारबाहीको माग गर्दै आउनु भएकी गंगामायाको अनसन शुक्रबारबाट तोडिएको छ । उनी वीर अस्पतालमा अनसनमा बसेकी थिइन् ।
राष्ट्रिय मानवअधिकार आयोगका अध्यक्ष अनुपराज शर्माले जुस खुवाएर अनशन तोडाएका हुन् । त्यसअघि कानुनमन्त्री शेरबहादुर तामाङद्वारा हस्ताक्षरित २ बुँदे पत्र पनि गंगामायालाई दिइएको थियो ।
पत्रमा २०७२ असोजमा जनाइएको ५ बुँदे प्रतिबद्धता कार्यान्वयन गर्ने उल्लेख छ । साथै गंगामायाले र सरकारले तोकेको प्रतिनिधि रहेको अनुगमन समिति बनाउन त्यसको अनुगमन गरी प्रतिवेदन बनाउने पनि पत्रमा उल्लेख छ ।
कानुनमन्त्री तामाङले गंगामायाको अनशन तोडिएको र गंगामायाले यसअघि गरिएका सहमति पालना गर्न सरकारलाई आग्रह गरेको बताए ।
‘विगतका सहमति पालना नभए फेरि पनि अनसन बस्छु भन्नुभएको छ, सरकार यसबारे गम्भीर छ’( तामाङको भनाइ छ ।
हत्या आरोपमा संलग्न भएका भनिएका छविलाल पौडेल सर्वोच्च अदालतमा आइतबार उपस्थित भएपछि डिल्लीबजार कारागार पठाइएको छ । पौडेलसँगै आरोपित अन्य अदालत उपस्थित भए पनि पौडेल भने यस अघि अदालतमा उपस्थित भएका थिएनन् ।
गंगामायाको अनशनलाई नजिकबाट हेर्दै आउनुभएका र उनको जीवनरक्षाका लागि आवाज उठाउदै आएका नेपाल मानव अधिकार संगठनका अध्यक्ष इन्द्रप्रसाद अर्यालले गंगामाया अनशन तोडे पनि अस्पतालमै रहेको र उनको बसोबासको लागि सरकारले व्यवस्था गरि दिनु पर्ने बताए ।
‘उहाँ अस्पतालमै हुनुहुन्छ, कहाँ जाने भन्ने टुंगो छैन, सरकारले ध्यान दिनुपर्छ’, अर्यालका अनुसार सहमति गरेका बुँदा पुरानै हुन्, सरकारले पूरा गर्न चासो दिनुको विकल्प छैन ।