काठमाडौं– आइतबार राती खेलिएको फिफा वल्र्डकप २०१८ को फाइनल खेलमा क्रोएसियालार्इ ४–२ गोलअन्तरले पछि पार्दै फ्रान्स दोस्रो पटक विश्वविजेता बन्न सफल भएको छ । यसअघि फ्रान्सले १९९८ मा विश्वकपकको उपाधि प्राप्त गरेको थियो ।
फ्रान्सले एक गोल आत्मघाती उपहार पाएको थियो भने मस्कोको लुजनिकी स्टेडियममा फ्रान्सलार्इ च्याम्पियन बनाउन एन्टिनियो ग्रिजम्यान, केलियन एम्बाम्पे र पाउल पोग्बाले १–१ गोल गरे । क्रोएशियाका इभान पेरिसिक र मारियो मान्डजुकिकले १–१ गोल फर्काएका थिए ।
खेलको १८ औं मिनेटमा एन्टिनियो ग्रिजम्यानले डी बक्स बाहिरबाट प्रहार गरेको फ्रिकिक क्रोएशियाका मारियो मान्डजुकिकको टाउकोमा लाग्दै बलले जाली चुमेपछि आत्मघाती गोलबाट फ्रान्सले सुरुवाती अग्रता लिएको थियो । जुन विश्वकप फाइनलको इतिहासमा भएको पहिलो आत्मघाती गोल समेत हो ।
इभान पेरिसिकले २८ औँ मिनेटमा क्रोएशियाका लागि बराबरी गोल फर्काएका थिए । १६ यार्ड बाट उनले प्रहार गरेको सटले जाली चुमेको थियो । ३६ औँ मिनेटमा एन्टिनियो ग्रिजम्यानले पेनाल्टी मार्फत फ्रान्सलार्इ २–१ को अग्रता दिलाएका हुन् । इभान पेरिसिको हातमा बल लागेपछि भिडियो एसिस्टेन्ट रेफ्रीको सहायतामा फ्रान्सले पेनाल्टी पाएको थियो ।
दोस्रो हाफमा बलमाथि क्रोएसियाले बढी नियन्त्रण गरे पनि फ्रान्सले पाएका अवसर सदुपयोग गर्दा फाइनल खेलमा फराकिलो जित दर्ता गर्न सफल भयो । फ्रान्सका लागि ५९ औं मिनेटमा पाउल पोग्वा र ६५ औं मिनेटमा केलियन एम्बाप्पेले गोल थपे ।
क्रोएसियाका लागि सान्त्वना गोल मारियो मान्जुकिजले ६९ औं मिनेटमा गरे । पहिलो पटक फाइनल पुगेको टिम क्रोएसियाले बलमाथि धेरै नियन्त्रण राखे पनि गोल गर्न नसक्दा हार व्यहोर्न पुग्यो ।