काठमाडौं– नेपाली सेनाको प्रधान सेनापतिमा पूर्णचन्द्र थापा नियुक्त भएका छन् । प्रधानसेनापति राजेन्द्र क्षत्री अनिर्वाय अवकासमा जानु एक महिनाअघि नै बिदामा बस्ने सैनिक परम्परा अनुसार हिजो बिहीबारदेखि बिदामा बस्नु भएपछि कामु प्रधान सेनापतिको जिम्मेवारी थापाले पाएका हुन् ।
प्रधानसेनापति क्षत्रीले बिहीबार नै एक कार्यक्रमको आयोजना गरेर प्रधानसेनापतिको जिम्मेवारी थापालाई हस्तान्तरण गरेका हुन् । यसअघि बसेको मन्त्रिपरिषदको बैठकले बिहीबारदेखि कामु प्रधानसेनापतिको जिम्मेवारी थापालाई दिने निर्णय गरेको थियो ।
नेपाली सेनाभित्र अब्बल सेनाका अधिकृतको रुपमा चिनिएका थापा संयुक्त राष्ट्र संघको अनुरोधमा सिरियाको गोलानहाइटमा फोर्स कमाण्डरको रुपमा समेत कार्यरत थिए । २०३६ सालदेखि सहायक सेनानीबाट नेपाल सेनामा प्रवेश गर्नु भएका थापाले कमाण्ड एण्ड स्टाफ कलेज नेपालबाटै गरेका थिए भने भारतबाट नेशनल डिफेन्स कोर्षको तालिम पुरा गरेका थिए । ।
त्रिभुवन विश्वविद्यालयबाट सामाजिक विज्ञानमा स्नातक थापाले भारतको मद्रास विश्वविद्यालयबाट डिफेन्स एण्ड स्ट्राटेजिक स्टडीमा स्नातकोत्तर गरेका छन् ।