नयाँदिल्ली- भारतको गुजरातमा विश्वकै सबैभन्दा अग्लो प्रतिमा अनावरण गरिएको छ । प्रधानमन्त्री नरेन्द्र मोदीले बुधबार स्वतन्त्रता सेनानी सरदार बल्लभ भाइ पटेलको ६ सय फिट अग्लो मूर्ति अनावरण गरेका हुन् ।
उक्त मूर्तिको निर्माण लागत २९ अर्ब नौ करोड भारतीय रुपैयाँ छ। अंग्रेजविरुद्धको स्वतन्त्रता आन्दोलनका एक मुख्य हस्ती पटेलको सम्मानका रूपमा उक्त मूर्ति निर्माण गरिएको भारत सरकारको दाबी छ । प्रधानमन्त्री मोदीले त्यसलाई ‘स्ट्याचु अफ युनिटी’ नाम दिएका छन् । स्थानीय बासिन्दाले भने एक मूर्ति बनाउन गरिएको खर्चलाई ‘पैसाको बर्बादी’ संज्ञा दिएका छन् ।
मूर्ति अनावरण गर्दै प्रधानमन्त्री मोदीले यसलाई भारतको अखण्डता र संकल्पको प्रतीक भएको बताए । अनावरण अगाडि वायु सेनाका जहाजहरूले फूलको वर्षा गरेर सरदार बल्लभभाइ पटेलप्रति सम्मान अर्पण गरेका थिए ।
उक्त मूर्ति भारतीय मूर्तिकार राम एस सुतारले निर्माण गरेका हुन् । गुजरातको मुख्यमन्त्री छँदा प्रधानमन्त्री मोदीले सन् २०१० मै उक्त मूर्ति निर्माण गर्ने घोषणा गरेका थिए ।
सरदार पटेलको मूर्ति न्युयोर्कको ‘स्ट्याचु अफ लिबर्टी’भन्दा करिब दोब्बर अग्लो छ । हालसम्म चीनको टेम्पल बुद्ध संसारको सबैभन्दा अग्लो प्रतिमा थियो । सरदार पटेलको मूर्ति त्यसभन्दा ५४ मिटर अग्लो छ । तर, यसले लामो समय संसारको अग्लो प्रतिमाको पहिचान कायम राख्न सक्ने छैन । किनकि, भारतकै महाराष्ट्रमा मराठा राजा स्वर्गीय शिवाजीको १ सय ९० मिटर अग्लो प्रतिमा निर्माणाधीन छ ।
सरदार पटेल स्वतन्त्र भारतका पहिलो गृह मन्त्री थिए । उनलाई भारतमा ‘आइरन म्यान अफ इन्डिया’का रूपमा पनि चिन्ने गरिएको छ । अंग्रेजबाट स्वतन्त्रता पाएपछि उनले विद्रोही राज्यहरूलाई एकताको सूत्रमा बाँध्न मुख्य भूमिका निर्वाह गरेका थिए ।
बिबिसी