सिड्नीमा धुलोयुक्त हुरी, जनजीवन प्रभावित

-- गोपाल छन्त्याल ?>

सिड्नी– धुलोयुक्त हुरीले  सिड्नीको जनजीवन बिहिबार बिहानै देखि प्रभावित बनेको छ । अष्ट्रेलियाको राजधानी क्यानवेरा क्षेत्रमा पनि सामान्य हुरी चलेको बताईएको छ । सिड्नी आसपास क्षेत्रमा बिहानै देखि तीब्र गतिको हुरीमा मानवीय स्वास्थ्यलाई प्रभाव पार्ने किसिमको कणहरु भएकाले घर बाहिर धेरै समय नबिताउन न्यू साउथ बेल्स राज्य सरकारले सार्वजनिक आब्हान गरेको छ । सरकारी टेलिभिजन एविसीका अनुसार, सन् २००९ पछि यस्तो धुलोयुक्त हुरी चलेको हो ।

आकाशमा विषालु कणयुक्त बादल मडारिएका कारण सिड्नीबाट आन्तरिक तथा बाह्य उडान प्रभावित भएको सरकारी अधिकारीहरुले जनाएका छन् । उनीहरुका अनुसार, शुक्रबार बिहानसम्म यस्तै हुरी चल्न सक्ने अवस्था छ । धुलोयुक्त हुरीका कारण सिड्नीको मूख्य पर्यटकीय गन्तव्य ओपेरा हाउस, बोन्डी ब्रीज, सिड्नी हार्वर ब्रिज लगायत क्षेत्र पर्यटकको चाप कम भएको छ । ति स्थानमा भिजिबिलिटी कम भएको छ । दक्षिण अष्ट्रेलियाबाट आएको न्यून चापीय चिसो हावाको प्रभावका कारण हुरी चलेको बताईएको छ ।