महेन्द्रनगर-  बलात्कारपछि हत्या गरिएकी कञ्चनपुरकी १३ वर्षीय बालिका निर्मला पन्तको योनीबाट संकलन गरिएका ‘भजाइनल स्वाब’ बाट तयार पारिएको डीएनए प्रोफाइलसँग आमाको डीएनए प्रोफाइल मिलेको छ ।

निर्मलाको ‘भजाइनल स्वाब’बाट तयार पारिएको डिएनए प्रोफाइलसँग आमा दुर्गादेवी पन्तको रगतको नमुनाबाट तयार पारिएको डीएनए प्रोफाइलसँग मिलेकोे कञ्चनपुरका प्रहरी प्रमुख एसपी कुवेर कडायतले बताए ।

गत पुष २६ गत निर्मलाकी आमा दुर्गा पन्तले क्रस चेकका लागि आफ्नो रगतको नमुना दिएकी थिईन । बालिका निर्मला पन्तको भजाइनल स्वाबबाट तयार पारिएको डीएनए प्रोफाइल उनको हो होइन भन्ने पुष्टि गर्न आमा दुर्गादेवीकोे रगतको नमुना संकलन गरिएको थियो ।

आमा दुर्गादेवी पन्तले आफ्नो रगतको नमूना संकलन गरिदिन प्रहरीलाई आग्रह गरेपछि जिल्ला प्रहरी कार्यालयले उनको रगतको नमुना संकलन गरेर प्रहरीको प्रयोगशाला र विधि विज्ञान दुवै ठाउँमा नमूना पठाएको थियो । रिपोर्टमा दुवैको डीएनए प्रोफाइल ९९ दशमलव ९९ प्रतिशत मेल खाएको छ ।

कञ्चनपुर प्रहरीका एसपी कुवेरसिहं कडायतका अनुसार स्थानिय, अधिकारकर्मी सरोकारवालाहरुको मागअनुसार आमाको रगत परीक्षणका लागि पठाइएको थियो । डीएनए प्रोफाइल म्याच भयो । ‘भजाइनल स्वाब’ निर्मलाकै हो भन्नेमा अब शंका रहेन ।’ बालिका निर्मला पन्तको ‘भजाइनल स्वाब’वाट तयार पारिएको डीएनए उनको हो वा होइन भन्ने सबैमा शंका थियो । आमाले त्यही शंका कम गर्नका लागि हामीलाई रगतको नमुना संकलन गरिदिन आग्रह गरेकी थिइन् ।

बालिका निर्मला पन्तकी आमा दुर्गादेबीले अनुसन्धानमा सहयोग पुर्‍याउन आफू तयार रहेको भन्दै सुरुदेखि नै आफ्नो रगतको नमुना संकलन गर्न माग राख्दै आएकी थिइन् । दुर्गादेवीले पुष २६ गते रगतको नमुना दिएपनि उनका श्रीमान यज्ञराजले भने आजका दिनसम्म रगत दिन मानेका छैनन् ।

प्रहरी महानिरीक्षक सर्वेन्द्र खनाल कञ्चनपुर पुगेका बेला अधिकारकर्मी संगको भेटघाटमा समेत निर्मलाको शरीरबाट संकलन गरिएको ‘भजाइनल स्वाब’मा नै शंका रहेकाले निवारणका लागि आमाबुवाको डीएनए परीक्षण गर्नुपर्ने माग राखेका थिए ।

बालिका निर्मला पन्तको बलात्कार र हत्याप्रकरण टुंगिन सकेको छैन् । बलात्कारपछि हत्या गरिएको ६ महिना बितिसकेको छ । तर अहिलेसम्म प्रहरीको केन्द्रीय अनुसन्धान ब्यूरो, जिल्ला प्रहरी कार्यालय सहितका झण्डै एक दर्जन समिति बनेर अनुसन्धान गरिरहेका छन् ।