अर्घाखाँची- अर्घाखाँचीको सन्धिखर्क नगरपालिका–६ नरपानीमा सन्धिखर्कबाट बुटवलका लागि छुटेको लु२ख २१४८ नम्बरको बस दुर्घटना हुँदा मृत्यु हुनेको संख्या १९ पुगेको छ ।

दुर्घटनामा परी १९ जनाको मृत्यु र एक दर्जन बढी घाइते भएको जिल्ला प्रहरी कार्यालय अर्घाखाँचीका प्रहरी नायव उपरीक्षक प्रकाश विष्टले बताउनुभयो ।

प्रहरीका अनुसार दुर्घटनामा परी १२ जना पुरुष र ७ जना महिलाको मृत्यु भएको छ । मृतकमध्ये १ बालक र १ बालिका रहेका छन् । दुर्घटनामा परी नं। ५ वाहिनी रूपन्देहीमा कार्यरत सशस्त्र प्रहरी जवान राजकुमार महतको मृत्यु भएको छ । मृतकमध्ये धेरैको घटनास्थलमा केहीको उपचारका क्रममा मृत्यु भएको छ ।

यो समाचार तयार पार्दासम्म मृतकको सनाखन हुन सकेको छैन । प्रदेश प्रहरी प्रमुख डीआईजी सुरेशविक्रम शाहका अनुसार सन्धिखर्कबाट बुटवलतर्फ आउँदै गरेको उक्त बस सडकबाट करिब ४ सय मिटर तल खसेको थियो ।

घाइतेमध्ये दुई जनाको सन्धिखर्क र अन्यको बुटवलमा उपचार भइरहेको छ ।

दुर्घटनास्थलमा नेपाली सेना, नेपाल प्रहरी र सशस्त्र प्रहरी तथा स्थानीयबासीले उद्धार गरेका थिए ।