आज फूलपाती !

-- नेपाली टाईम्स अष्ट्रेलिया ?>

काठमाडौं— नवरात्रको सातौँ दिन आज शुक्रबार घटस्थापना गरिएको स्थानमा फूलपाती भित्र्याइँदै छ ।

दारिम, कटुस, उखु, अदुवा, केराको पातसँगै पुष्पगुच्छा सहितको यो फूलपातीलाई स्वच्छ र शुद्ध रहेर घटस्थापना गरिएको स्थानमा अर्पण गरिन्छ ।

हनुमानढोका दरबारस्थित दशैँघरमा आज शुक्रबार करिब सवा तीन बजे गोरखाबाट धादिङको धुनीबेँसी हुँदै जमलमा आशागुर्जा र कल्स्यौँडी सहितको फूलपाती ल्याइनेछ ।

त्यसलाई हनुमानढोका दरबारबाट स्वागतका लागि आएको सरकारी टोलीले दशैँघरमा फूलपाती भित्र्याउने तय भएको नेपाली सेनाको शार्दुलजंग गुल्मपति विकास शाक्यले जानकारी दिएका छन् ।

कोरोनाबाट बचाउ गर्दै थोरै कर्मचारी यो समारोहमा सहभागी हुँदैछन् ।

अमालकोट कचहरी कार्यालयको तुलजा भवानीमा पनि अमालका द्वारेबाट फूलपाती भित्र्याइँदैछ ।

यसैबीच वर्षको एक दिन महानवमीका दिन सर्वसाधारणका लागि खुला हुने हनुमानढोकास्थित तुलजा भवानी यसपालि कोरोनाकै कारण खुल्ने छैन ।

भवानीका मूल पुजारी उद्धव कर्माचार्यका अनुसार तुलजामा यो दिन साबिक पूजा भने हुन्छ ।