सिड्नी– अस्ट्रेलियाले आफ्ना नागरिकलाई यही मार्चदेखि कोभिड–१९ विरुद्धको खोप उपलब्ध गराउने भएको छ ।

स्वास्थ्यमन्त्री ग्रेग हन्टले निर्माण भएको खोप मार्चसम्म अस्ट्रेलियालीलाई उपलब्ध गराउनका लागि सरकारले द्रुत गतिमा काम गरिरहेको जनाएका छन् ।

अस्ट्रेलियाले विश्वका विभिन्न चारवटा खोप उत्पादक कम्पनीसँग खरिद सम्झौता गरिसकेको छ ।

स्वास्थ्य विभागका अनुसार परीक्षण प्रक्रिया पूरा भएर औषधि विभाग (थेराप्युटिक गुड्स एडमिनिस्ट्रेसन, टीजीए) ले अनुमति दिए लगत्तै ती खोप सर्वसाधारणलाई नि:शुल्क उपलब्ध गराइने जनाएको छ ।

अस्ट्रेलियाले खोप लगाउन अनिवार्य नगरेको भए पनि सबै नागरिकलाई पर्याप्त हुने मात्रा आयात गरिने तथा केही देशभित्रै उत्पादन हुने जनाएको छ ।

हाल ९५ प्रतिशतसम्म सफल नतिजा दिएका फाइजर, अस्ट्राजेनेकालगायत कम्पनीसँग खोप खरिद गर्न अर्बौं डलरको सम्झौता भइसकेको छ ।

खोप खरिदका लागि अस्ट्रेलियाले साढे ३ अर्ब डलर लगानी गरेको छ ।

‘पहिलो चरणमा स्वास्थ्यकर्मी र वृद्धवृद्धालाई यो खोप नि:शुल्क उपलब्ध गराइनेछ,’ स्वास्थ्यमन्त्री हन्टले भनेका छन् ।

उनले पहिलो चरणमा उनीहरूलाई उपलब्ध गराइए पनि सबै नागरिकले नि:शुल्क खोप लिन पाउनेसमेत जानकारी दिएका छन् ।

टिजिएले फाइजर तथा अस्ट्राजेनेका कम्पनीद्वारा निर्माण गरिएको भ्याक्सिनलाई पूर्वस्वीकृति दिइसकेको जनाइएको छ ।

अस्ट्रेलियाले अस्ट्राजेनेका कम्पनीबाट ३ करोड ८ लाख डोज खरिद गर्ने सम्झौता गरिसकेको छ भने फाइजरबाट १ करोड खोपसमेत ल्याउने तयारी गरिरहेको छ ।

अस्ट्राजेनेकाको खोप स्वीकृत भएलगत्तै करिब ३ करोड डोज स्थानीय तहमै उत्पादन गरिने भएको छ ।

स्वास्थ्य विभागको तथ्यांकअनुसार यी दुईबाहेक क्युन्सल्यान्ड युनिभर्सिटी तथा सीएसएलले तयार गरिरहेको भ्याक्सिन ५ करोड डोज उपलब्ध गराउनेछ ।

यसैगरी परीक्षणकै क्रममा रहेको नोभाभ्याक्स खोप समेत ४ करोड डोज उपलब्द्ध गराईने जानकारी उपलब्द्ध गराइएको छ ।

स्वास्थ्यमन्त्री हन्टले अस्ट्रेलियाका नागरिकलाई आवश्यक पर्नेभन्दा ३ गुणा बढी खोपको प्रबन्ध गरिएको बताएका छन् ।

अस्ट्रेलियाले यसअघि नै कोभिड–१९ विरुद्धको खोपका लागि सरकारी तयारी र यसको वितरणका लागि पहिलो पटक खोप नीति सार्वजनिक गरिसकेको छ ।

२० पृष्ठ लामो नीतिमा खोप खरिद, वितरण, स्थानीय निकायसँगको सहकार्य, तथ्यांक संकलनलगायत विषय उल्लेख गरेको कान्तिपुरमा प्रकाशित समाचारमा उल्लेख छ ।