सिड्नी– अस्ट्रेलियाले फाइजर र बायोएनटेकले संयुक्त रुपमा विकास गरेको कोरोना खोपलाई आफ्नो देशमा प्रयोगका लागि अनुमति दिएको छ ।

अस्ट्रेलियाको औषधिसम्बन्धी नियमनकारी निकाय थेराप्युटिक गुड्स एडमिनिस्ट्रेसन (टीजीए) ले आज सोमबार उक्त खोपको प्रयोगका लागि अनुमति दिएको हो ।

प्रधानमन्त्री स्कट मरिसनले सोमबार बिहान पत्रकार सम्मेलन गर्दै अस्ट्रेलियामा खोप प्रयोगको अनुमतिसँगै कोरोना भाइरसविरुद्ध लड्नका लागि अझ एक कदम अघि बढेको बताएका छन् ।

फाइजरपछि अक्सफोर्ड–एस्ट्राजेनेकाद्वारा निर्मित खोपले अनुमति पाउने सञ्चारमाध्यमले उल्लेख गरेका छन् ।

सरकारले पहिलो चरणमा ल्याएको खोप वृद्धवृद्धाका साथै अग्रपंक्तिमा रहेर काम गर्ने स्वास्थ्यकर्मीलगायतलाई वितरण गरिने सरकारले घोषणा गरेको छ ।

साताको ८० हजारका दरले उनीहरुलाई पहिलो चरणको खोप दिइने योजना सार्वजनिक भएको छ, जसलाई बढाएर मार्चसम्ममा ४० लाख पुर्‍याइने योजना छ ।

अस्ट्रेलियाले १४ करोड डोज कोरोना खोपका लागि विभिन्न कम्पनीसँग सहमति गरिसकेको बताइएको छ ।

अस्ट्रेलियामा विभिन्न १ हजार खोप केन्द्रबाट वितरण गरिने खोपका लागि सरकारले केही साता पहिले नै विभिन्न ५ तहको कार्यक्रम नै सार्वजनिक गरिसकेको छ ।