नेपाल चलचित्र प्राविधिक संघ तथा ड्रिम हाइ नेपालको संयुक्त आयोजनामा सम्पन्न हुने १० औं संस्करणको एलआइसी नेफ्टा फिल्म अवार्डको मनोनयन सार्वजनिक गरिएको छ । काठमाडौंमा आयोजित एक समारोहमा अवार्डका उत्कृष्ट पाँच मनोनयन सार्वजनिक गरिएको हो । अवार्डको महत्वपूर्ण उत्कृष्ट निर्देशकको विधामा नरेश कुमार केसी (रोमियो एण्ड मुना), दिनेश राउत (प्रसाद), सुदर्शन थापा (रामकहानी), दीपाश्री निरौला (छक्का पञ्जा–३) तथा झरना थापा (ए मेरो हजुर–३) मनोनित छन् । ३१ विधामा वितरण गरिने नेफ्टा अवार्डको मनोनयनमा उत्कृष्ट अभिनेताको विधामा दुई फिल्महरु प्रसाद तथा हरीबाट विपिन कार्की, रोमियो एन्ड मुनाबाट बिनय श्रेष्ठ, डमरुको डन्डिबियोबाट खगेन्द्र लामिछाने तथा ए मेरो हजुर–३ बाट अनमोल केसी परेका छन् । उत्कृष्ट नायिकाको विधामा प्रसाद बाट नम्रता श्रेष्ठ, रोमियो एन्ड मुनाबाट सृष्टि श्रेष्ठ, साइँलीबाट मेनुका प्रधान, रामकहानीबाट पूजा शर्मा तथा छक्का पञ्जा–३ बाट दीपिका प्रसाईंबीच प्रतिस्पर्धा हुने भएको छ । आगामी मार्च १३ का वितरण गरिने उक्त अवार्डको उत्कृष्ट फिल्मतर्फ प्रसाद, रोमियो एन्ड मुना, हरी, कथा काठमाडौं तथा छक्का पञ्जा–३ बीच प्रतिस्पर्धा हुनेछ । नेफ्टा अवार्डको मनोनयनमा प्रसाद सर्वाधिक १३ विधामा परेको छ भने ए मेरो हजुर–३ ११ वटामा मनोति छ । यसैगरी छक्का पञ्जा–३ १० तथा हरी ८ विधामा मनोनित भएका छन् । नेफ्टा अवार्डको दशौं संस्करण होटल सोल्टीमा आयोजना हुनेछ ।