काठमाडौं– अञ्जन विष्ट र नवयुग श्रेष्ठको गोलमा नेपालले चाइनिज ताइपेइमाथि २-० को प्रभावशाली जीत निकालेको छ ।

नेपाली राष्ट्रिय फुटबल टोलीका प्रशिक्षक अब्दुल्लाह अलमुताइरीले चाइनिज ताइपेइविरुद्ध विश्वकप छनोटमा प्राप्त गरेको जीत अग्रपंक्तिमा रहेर काम गरिरहेका स्वास्थ्यकर्मीलाई समर्पित गरेका छन् ।

गए राति सम्पन्न फिफा विश्वकप २०२२ तथा एसियन कप २०२३ को छनोट अन्तर्गत समूह चरणको छैटौं खेलमा नेपालले चाइनिज ताइपेइमाथि उत्कृष्ट जीत निकालेको हो ।

नेपालले खेलको तेस्रो मिनेटमा नै पाएको पेनाल्टीलाई अञ्जन विष्टले गोल गर्दै नेपाललाई सुखद सुरुवात दिलाएका हुन् ।

जारी विश्वकप छनोटमा अञ्जनको यो तेस्रो गोल हो ।

सन्तोष तामाङको फ्रिकिकमा विपक्षी खेलाडीले पेनाल्टी क्षेत्रभित्र ह्यान्ड गरेपछि नेपालले पेनाल्टी पाएको थियो ।

खेलको ८० औं मिनेटमा मनिष डाँगीले एकल प्रयासमा बल अघि बढाएर गरेको प्रहार पोस्टभन्दा थोरै माथिबाट बाहिरियो ।

त्यसको एक मिनेट नबित्दै वैकल्पिक खेलाडीका रुपमा मैदान प्रवेश गरेका नवयुग श्रेष्ठले नेपालको अग्रता दोब्बर पारे ।

अञ्जन विष्टको पासमा सुमन अर्यालले पेनाल्टी क्षेत्र भित्रबाट दिएको क्रसलाई नवयुगले पहिलो टचमा नै गोलमा परिणत गर्दै नेपाललाई २-० ले अघि बढाएका थिए ।

यस जीतसँगै नेपालले विश्वकप छनोटको समूह चरणमा चौथो स्थानमा रहने पक्का गरेको छ ।

नेपालको एसियन कप छनोटको तेस्रो चरणमा प्रवेश गर्ने सम्भावना पनि जीवित रहेको छ ।

नेपालको ६ खेलमा २ जीत र ४ हारसहित ६ अंक रहेको छ ।

अष्ट्रेलियाले ४ खेलमा १२ अंक जोड्दा जोर्डन र कुवेतको ५-५ खेलमा समान १०-१० अंक रहेको छ ।

नेपालले अब छनोटको सातौं खेलमा जोर्डनको सामना गर्नेछ ।

यो खेल आगामी सोमबार राति ९:४५ बजे हुनेछ ।