प्राधिकरणको प्रमुख कार्यकारीमा पुन: कुलमान !

-- नेपाली टाईम्स अष्ट्रेलिया ?>

काठमाडौं– नेपाल विद्युत प्राधिकरणका प्रमुख कार्यकारी अधिकृतमा कुलमान घिसिङ पुन: नियुक्त हुनु हुने भएको छ ।

प्रधानमन्त्री शेरबहादुर देउवाले नेपाल विद्युत प्राधिकरणका प्रमुख कार्यकारी अधिकृतमा कुलमान घिसिङ्गलाई नियुक्त गर्न आवश्यक प्रक्रिया थाल्न आदेश दिनु भएपछि यसको प्रकृया प्रारम्भ हुने भएको हो ।

उर्जा जलस्रोत तथा सिचाईमन्त्री पम्फा भुषाललाई प्रधानमन्त्रीले निर्देशन दिएको प्रधानमन्त्री शेरबहादुर देउवाको सचिवालयका उपसचिव बद्री तिवारीले जानकारी दिनु भएको छ ।

तिवारीका अनुसार प्रधानमन्त्रीबाट निर्देशन भएकोले एक–दुई दिनमै नियुक्तीको प्रक्रिया थालिने छ ।

विगतमा लोडसेडिङ्ग हटाउन महत्वपूर्ण भूमिका निर्वाह गरी चर्चामा आउनु भएका घिसिङ एक वर्ष अघि चार वर्षे कार्यकाल पूरा गरी प्रमुख कार्यकारीबाट अवकाश पाउनु भएको थियो ।

केपी शर्मा ओली नेतृत्वको सरकारले उहाँको स्थानमा हितेन्द्रदेव शाक्यलाई नियुक्त गरेको थियो ।