काठमाडौं– नेपाली लिग स्पिनर सन्दीप लामिछानेले ११औं संस्करणको बिग बास लिग (बिबिएल) पुनः होबार्ट हुरिकेन्सबाट खेल्ने भएका छन् ।

अष्ट्रेलियामा आगामी मङ्सिर १९ देखि माघ १४ गतेसम्म हुने उक्त प्रतियोगिताका लागि होबार्टले लामिछानेलाई बिहिबार अनुबन्ध गरेको हो ।

गत वर्ष पनि उनी सोही टोलीमा अनुबन्धित भएका थिए ।

होबार्टले लामिछानेलाई यस यामका लागि पहिलो अन्तर्राष्ट्रिय खेलाडीका रुपमा टोलीमा अनुबन्ध गरिएको जनाएको छ ।

गत वर्षको बिबिएलमा उनले आठ खेलमा आठ विकेट लिएका थिए ।

लामिछाने बिबिएल खेल्ने पहिलो नेपाली खेलाडी हुन् ।

लामिछानेले बिबिएलमा हालसम्म तीन वटा संस्करण खेल्दा २९ खेलमा ३४ विकेट लिइसकेका छन् ।

सन् २०१८ मा पहिलो पटक मेलवर्न स्टार्सबाट बिबिएल खेल्दा उनले आठ खेलमा ११ विकेट लिएका थिए ।

सन् २०१९ मा दोस्रो पटक बिबिएलमा उनले १३ खेलमा १५ विकेट लिएका थिए ।

आइसीसी विश्वकप क्रिकेट लिग–२ अन्तर्गत ओमान र अमेरिकासँगको त्रिकोणात्मक एकदिवसीय सिरिज खेल्नका लागि उनी हाल ओमानमा छन् ।

उक्त सिरिजका कारण लामिछानेले यस पटकको क्यारेबियन प्रिमियर लिग ९सिपिएल० टी–ट्वान्टी क्रिकेट प्रतियोगिता त्याग्नेका छन् ।

यसपटक उनले राहदानीको समस्याका कारण बेलायतमा भएको द हन्ड्रेड क्रिकेट र भाइटालिटी टी–ट्वान्टी ब्लास्ट क्रिकेट प्रतियोगिता गुमाउनु परेको थियो ।