काठमाडौं– नेपाल पञ्चांग निर्णायक समितिले यस वर्षको दशैँको टीकाको साइत सार्वजनिक गरेको छ ।

दशैंको टीकाको साइत अक्टोबर १५ (२९ असोज) शुक्रबार बिहान १०ः०२ बजे रहेको समितिका अध्यक्ष कृष्ण अधिकारीले जानकारी दिए ।

२१ असोज बिहीबार बिहान ११ः४६ बजे घटस्थापनाको साइत रहेको जानकारी दिएका उनले घटस्थापनाअघि चित्रा नक्षत्र र वैधृति योगको शान्ति गर्नुपर्ने बताए ।

उक्त दिन चित्रा नक्षत्र र वैधृति योग परेकाले घटस्थापनाअघि चित्रा नक्षत्र र वैधृति योगको शान्ति गर्नुपर्ने भएको अध्यक्ष अधिकारीले बताए ।

यसैगरी २२ असोज शुक्रबार बिहान ११ः५६ बजे झन्डा फेर्ने साइत रहेको र पश्चिम फर्केर झन्डा फेर्नुपर्नेछ ।

२६ असोज मंगलबार फूलपाती परेको र फूलपाती भित्र्याउन साइतको आवश्यक नपर्ने बताउँदै उनले फूलपातीको दिन सरस्वतीको पूजासमेत गर्नुपर्ने बताए ।

२७ असोजमा महाअष्टमी र सोही दिन कालारात्री पूजा परेको छ ।

२८ असोज बिहीबार महानवमी मनाइनेछ ।

२९ असोज शुक्रबार विजयादशमी परेको र उक्त दिन देवी विसर्जनपछि टीका लगाउनुपर्ने अधिकारीले जानकारी दिए ।

देवी विसर्जनको साइत २९ असोज शुक्रबार बिहान ८ः१९ बजे रहेको अधिकारीले न्युज कारखानालाई बताए ।

उनका अनुसार टीकाको साइत २९ असोज शुक्रबार बिहान १०ः०२ बजेको छ ।

टीका लगाइदिने व्यक्ति पश्चिम र टीका थाप्ने व्यक्ति पूर्व फर्कनु पर्नेछ ।

विजयादशमीका दिन बिहान ७:०१ बजे तुलजा भवानीलाई मूल चोकबाट मूल मन्दिरमा फिर्ती यात्रा गराइने रहेको र बिहान ८ः३२ बजे स्थिरासन गराइने साइत रहेको उनले बताए ।

यस्तै २ कात्तिक मंगलबार कोजाग्रत पूर्णिमा र व्रत परेको अध्यक्ष अधिकारीले बताए ।

उनका अनुसार आश्विन शुक्ल पूर्णिमाका दिन २ कात्तिक मंगलबार सबै बलि पूर्ति गरिने र सोही रात कोजाग्रत पूर्णिमाको व्रत बसेर मनाइने छ ।