काठमाडौं– साफ च्याम्पियनसिप फुटबल प्रतियोगिताको १३औं संस्करण भोलि शुक्रवारदेखि माल्दिभ्समा प्रारम्भ हुँदैछ ।

साफ च्याम्पियनसिप १६ अक्टोबरसम्म माल्दिभ्सको मालेस्थित राष्ट्रिय रंगशालामा आयोजना हुनेछ ।

यस पटक साफमा पाँच राष्ट्र मात्र सहभागी हुँदैछन् ।

भुटानले कोरोना कारण सहभागी नहुने बताउँदा फिफाको प्रतिबन्धका कारण पाकिस्तानले सहभागिता जनाएको छैन ।

सिंगल राउण्ड रोबिनको आधारमा सञ्चालन हुने साफमा साविक विजेता माल्दिभ्स, साविक उपविजेता भारतसहित नेपाल, बंगलादेश र श्रीलंकाबीच प्रतिस्पर्धा हुनेछ ।

तालिकाको शीर्ष दुईमा रहने टोली दक्षिण एसियाली च्याम्पियन बन्ने छन् ।

गत फागुनमा नेपालले मुख्य प्रशिक्षकमा कुवेती नागरिक अब्दुल्लाह अल्मुताईरीलाई भित्र्याउँदै साफको योजना र प्रशिक्षण प्रारम्भ गरेको थियो ।

अखिल नेपाल फुटबल संघ एन्फाले अल्मुताईरीलाई आफ्नो मुख्यालयमा भित्र्याउँदै गर्दा उनले आफ्नो मूख्य लक्ष्य नेपाललाई साफको उपाधि दिलाउने बताएका थिए ।

उनले एन्फासँग सहयोग माग्दै खेलाडीलाई बढीभन्दा बढी अभ्यास दिन आग्रह गरे ।

त्यसयता, नेपाली टोली लगातार केही प्रतियोगिता, केही मैत्रीपूर्ण खेल, बन्द प्रशिक्षण र बन्द प्रशिक्षण क्रममा मैत्रीपूर्ण खेलमा रहेको छ ।

अब्दुल्लाहको आगमनसँगै नेपालले सात ठूला खेल खेलिसकेको छ ।

अब अब्दुल्लाहको प्रशिक्षणमा नेपालले खेल्ने साफ च्याम्पियनसिप सबैभन्दा महत्वपूर्ण प्रतियोगिता हो ।

हाल दक्षिण एसियाली फुटबलबाट माथि उठ्न नसकेको नेपाली टोलीको ‘टार्गेट’ नै साफ उपाधि रहने गर्दछ ।

नेपालले साफको १३औं संस्करण आइपुग्दा हालसम्म उपाधि हात पार्न सकेको छैन ।

यति मात्रै हैन, नेपाल फाइनल नै पुग्न सकेको छैन ।

नेपाल सधैं साफको उपाधि दाबेदारी रह्यो र उपाधिबिहीन पनि । यस क्रममा नेपालले १३ संस्करण नै खेलेको छ ।

त्यसैले मालेमा नेपाली टोलीको लक्ष्य मात्र उपाधि हुनेछ ।

मालेस्थित राष्ट्रिय रंगशालामा हुने साफ शुक्रबार उद्घाटन हुनेछ ।

नेपालले आफ्नो पहिलो खेलमा शनिबार आयोजक माल्दिभ्सको सामना गर्दैछ ।

खेल राति पौने १० बजेदेखि प्रारम्भ हुनेछ ।

साफमा नेपालको खेल– समय

नेपाल विरुद्ध माल्दिभ्स – असोज १६ गते – राति ९ः४५ बजे

नेपाल विरुद्ध श्रीलंका – असोज १८ गते – राति ९ः४५ बजे

नेपाल विरुद्ध भारत – असोज २४ गते – राति ९ः४५ बजे

नेपाल विद्ध बंगलादेश – असोज २७ गते – अपरान्ह ४ः४५ बजे

नेपाली टिम

गोलकिपर – किरणकुमार चेम्जोङ ९कप्तान०, विशाल श्रेष्ठ, दीप कार्की

डिफेन्डर – दिनेश राजवंशी, अनन्त तामाङ, गौतम श्रेष्ठ, सुमन अर्याल, रोहित चन्द

मिडफिल्डर – तेज तामाङ, सुजल श्रेष्ठ, सन्तोष तामाङ, आयुष घलान, कमल थापा, विशाल राई, सुनील बल, सुरज जिउ ठकुरी, नितिन थापा, पुजन उपरकोटी

स्ट्राइकर – नवयुग श्रेष्ठ, मनिष डाँगी, अन्जन विष्ट, सुमन लामा, आशिष लामा