काठमाडौं– माल्दिभ्समा जारी साफ च्याम्पियनसिप फुटबल अन्तर्गत आईतबा राति भएको खेलमा नेपाल भारतसँग १–० गोल अन्तरले पराजित भएको छ ।

मालेस्थित राष्ट्रिय रंगशालामा भारतलाई जित दिलाउन कप्तान सुनिल क्षेत्रीले निर्णायक गोल गरेका हुन् ।

कप्तान खड्काले खेलको ८२ औं मिनेटमा फारुख चौधरीको हेडर पासमा गोल गरेका हुन् ।

भारतका लागि सुनिलको यो ७७ औं गोल हो ।

नेपालविरुद्ध एकतर्फी खेल पस्किएको भारतले गोलका थुप्रै अवसरहरु खेर फालेको थियो ।

पहिलो हाफको ३३ औं मिनेटमा सुनिलले खाली पोस्टमा गर्न सकेनन् ।

नेपालका कप्तान तथा गोलकिपर किरण चेम्जोङ बिट भईसकेको अवस्थामा उनको वान टच प्रहारले पोस्टको दिशा लिन सकेको थिएन ।

खेलको ५७ औं मिनेटमा पनि भारतका मनबिर सिंहले गोलको अवसर गुमाए ।

सिंहको फ्रि हेडर नेपालका कप्तान तथा गोलकिपर किरणले उत्कृष्ट बचाउ गरेका थिए ।

अकोतिर, नेपालले दुबै हाफमा भारतविरुद्ध कुनैपनि डरलाग्दो पोस्ट आक्रमण गर्न सकेन ।

यससँगै भारतले प्रतियोगितामा पहिलो जित निकालेको छ ।

भारतले ३ खेलमा ५ अंक जोडेको छ ।

भारत तेस्रो स्थानमा समेत उक्लिएको छ ।

नेपालको यो पहिलो हार हो ।

नेपालले ३ खेलमा ६ अंक जोडेको छ ।

नेपाल दोस्रो स्थानमा झरेको छ ।

६ अंक जोडेको माल्दिभ्स शीर्ष स्थानमा उक्लिएको छ।

भारतसँगको हारसँगै अब नेपाललाई फाइनल पुग्न अन्तिम खेल कुर्नु पर्ने भएको छ ।

अब नेपालले अन्तिम खेलमा बंगलादेशविरुद्ध बुधबार प्रतिस्पर्धा गर्नेछ ।

अब बंगलादेशविरुद्ध बराबरी अथवा जित निकालेमा मात्र नेपाल फाइनलमा पुग्नेछ ।

बंगलादेशलाई भने फायनल पुग्नका लागि नेपालविरुद्ध जित्नै पर्नैछ ।

बंगलादेश ३ खेलमा ४ अंक जोडेर चौंथो स्थानमा रहेको छ ।

जारी साफ च्याम्पियनसिपमा ५ राष्ट्रको सहभागिता रहेको छ ।

शीर्ष दुई टोलीले उपाधिका लागि प्रतिस्पर्धा गर्ने छन् ।

श्रीलंका भने बाहिरिसकेको छ ।