काठमाडौं— पेरिसबाट काहिराका लागि उडेको इजिप्ट एयरको विमान वेपत्ता भएको छ । इजिप्ट एयरका अनुसार फ्रान्सको पेरिसबाट इजिप्टको काहिराका लागि उडेको उडान संख्या एमएस ८०४ को उक्त विमानमा ५९ यात्री र चालक दलका १० सदस्य थिए ।
विमान पछिल्लो पटक रडारको सम्पर्कमा रहेका बेला पूर्वी भूमध्यसागर माथि ३७ हजार फिटको उाचाईमा रहेको बताइएको छ । सम्पर्कबिहीन भएको इजिप्ट एयरको विमान अझै फेला परेको छैन । विमान पूर्वी भूमध्यसागरमा प्रवेश गरेलगैत राडारसंग सम्पर्क बिहीन भएको हो । ५६ जना यात्रु र १० जना चालकदलका सदस्यसहित उठेको फ्लाइट एमएस ८०४ को विमान नेपाली समय अनुसार बिहीबार बिहान साढे ६ बजेदेखि सम्पर्क बिहीन भएको हो । ११ हजार तीन सय मिटर माथिको उचाइमा उडिरहेका बेला विमानको सम्पर्क टुटेको हो ।
विमानले कठिन सिग्नल पठाएको इजिप्ट एयरले बताएपनि इजिप्टियन सेनाले भने त्यो अस्वीकार गरेको छ । ग्रिस तथा इजिप्टियन सेना विमानको खोजीमा जुटेका छन् । फ्रान्सले खोजीमा सहयोग गर्न डुंगा तथा विमान पठाउने भएको छ ।
विमानमा सबै भन्दा धेरै ३० जना इजिप्टका यात्रु छन् । त्यस्तै फ्रान्सका १५, इराकका दुई तथा बेलायतका एक नागरिक रहेको इजिप्ट एयरले जनाएको छ । क्यानडा, बेल्जियम, कुवेत, साउदी अरेबिया, अल्जेरिया, सुडान, चाड तथा पोर्चुगलका नागरिक पनि विमानमा छन् । यात्रुका आफन्त कायरो विमानस्थलमा भेला भएका छन् ।