काठमाडौं– ‘मिस युनिभर्स नेपाल– २०२१’ को उपाधि सुजिता बस्नेत जितेकी छिन् ।

शनिबार साँझ काठमाडौंमा आयोजित ग्रान्ड फिनालेमा उनले १५ प्रतियोगीलाई पछि पर्दै उपाधि जितेकी हुन् ।

दुई सव-टाइटल समेत जितेकी विजेता बस्नेतले १० लाख रुपैयाँ नगद प्राप्त गर्दै हिरा जडित ताज लगाउन सफल भइन् ।

गत वर्षकी ‘मिस युनिभर्स नेपाल’ विजेता अंशिका शर्माले उनलाई ताज पहिर्याएकी थिइन् ।

उत्कृष्ट १६ बाट १० र ५ हुँदै अन्त्इमा विजेता घोषणा गरिएको प्रतियोगितामा नीनकान्ता मण्डलले फस्ट रनर्सअप, रक्षा उप्रेतीले सेकेन्ड रनर्सअप, प्रतिक्षा महरा क्षेत्रीले थर्ड रनर्सअप तथा डा। केशु खड्काले फोर्थ रनर्सअपको उपाधि जिते ।

विजेता बस्नेतले आगामी १२ डिसेम्बरमा इजरायलमा आयोजना हुने ‘मिस युनिभर्स’ मा नेपालको तर्फबाट प्रतिनिधित्व गर्नेछिन् ।

प्रतियोगिताको निर्णायकमा गायिका इन्दिरा जोशी, मानसी अग्रवाल, सरिता ज्ञावली आदि थिए ।

प्रतियोगिताको फ्रेन्चाइज नेपालमा ‘मिस नेपाल अर्थ २०१२’ नग्मा श्रेष्ठले व्यक्तिगत पहलमा भित्र्याएकी हुन् ।

सन् २०१७ मा उनी पहिलो पटक नेपालको प्रतिनिधित्व गर्दै ‘मिस युनिभर्स’ सहभागी भएकी थिइन् ।

सोही प्रतियोगीतमा नेपालको प्रतिनिधि पठाउने उदेश्यले उनले गत वर्षदेखि ‘मिस युनिभर्स नेपाल’ आयोजना थालेकी हुन् ।