काठमाडौं– नेपालका ओपनर आसिफ शेख तथा तीव्र गतिका बलर सोमपाल कामी, आदिल अन्सारी र करण केसीको उच्च प्रदर्शनमा नेपालले स्कटल्यान्डमाथि ऐतिहासिक जीत हासिल गरेको छ । बुधवार राति सम्पन्न आइसिसी विश्वकप लिग–२ त्रिकोणात्मक वन डे सिरिजमा स्कटल्यान्डलाई ५ विकेटले पराजित गर्दै नेपालले इतिहास रचेको हो । नेपालले आफ्नो क्रिकेट इतिहासमा पहिलो पटक स्कटल्यान्डलाई हराएको हो । जीततको लागि १ सय ४५ रनको विजयी लक्ष्य पछ्याएको नेपालले २५.१ ओभरमा ५ विकेट गुमाउँदै लक्ष्य पूरा गर्यो ।

यो जीतसँगै नेपाल अंक तालिकामा पाँचौं स्थानमा उक्लिएको छ । नेपाललाई सहज जिताउन युवा ओपनर आसिफ शेख ६२ बलमा १० चौका र एक छक्कासहित सर्वाधिक ७१ रनको योगदान दिए । आसिफले छक्का हान्दै ४८ बलमा आफ्नो वन डे करिअरको चौथो अर्धशतक पूरा गरेका थिए । त्यस्तै रोहित पौडेल ३१ बलमा ५ चौकासहित ३४ रनमा अविजित रहे । दीपेन्द्रसिंह ऐरी ३ र आरिफ शेख १ रनमा आउट भए । आसिफ र कुशल भुर्तेलले पहिलो विकेटका लागि ७.२ ओभरमा ४७ रनको साझेदारी गर्दै राम्रो सुरुवात दिलाएका थिए । कुशलले २७ रन बनाए ।

त्यसअघि, नेपालले जीतका लागि १४५ रनको लक्ष्य पाएको थियो । स्कटल्यान्डको ग्लासगोस्थित टिटउड क्रिकेट मैदानमा टस हारेर ब्याटिङ गरेको घरेलु टोलीले ४२.५ ओभरमा सबै विकेट गुमाएर १४४ रन बनायो । नेपालका सोमपाल कामी, आदिल अन्सारी र करण केसीले उत्कृष्ट बलिङ गरेपछि स्कटल्यान्ड सस्तैमा समेटिएको हो । स्कटल्यान्डका लागि नवौं नम्बर ब्याटिङ गर्न लागेको गाबिन मैनले सर्वाधिक ६४ रन बनाए । त्यस्तै, मार्क वाटले १७, सफयान शरिफले १६, कालुम म्याकलोड १३ रन बनाउँदा अन्य खेलाडीले दोहोरो अंकमा रन बनाउन सकेनन् । नेपालका सोमपालले १० ओभरमा ४० रन दिएर तीन विकेट लिए । आदिल अन्सारीले १० ओभरमा १ मेडनसहित ३१ रन खर्चिएर ३ विकेट झारे । करण केसीले ९ ओभरमा ३१ रन दिएर एक विकेट लिए । कप्तान सन्दीपले १० ओभरमा ३५ रन दिएर २ विकेट लिए । दीपेन्द्रसिंह ऐरीको नाममा एक विकेट रह्यो । श्रृंखलाका लागि स्कटल्याण्डको भ्रमणमा रहेको नेपाल पहिलो खेलमा नामिबियासँग ४० रनले पराजित भएको थियो भने स्कटल्यान्डले नामिबियालाई ७७ रनले हराएको थियो ।