डा.भट्टराईद्वारा नयाँ पार्टी दर्ता

-- नेपाली टाईम्स अष्ट्रेलिया / प्रकाशित मिति : शुक्रबार, साउन १३, २०७९

काठमाडौं– जनता समाजवादी पार्टी (जसपा) नेपालबाट अलग्गिएको डा.बाबुराम भट्टराई पक्षले निर्वाचन आयोगमा नयाँ दल दर्ता गराएको छ । उक्त समूहले निर्वाचन आयोगमा नेपाल समाजवादी पार्टी दर्ता गराएको हो । आयोगमा यसअघि दर्ता भएको समावेशी लोकतान्त्रिक पार्टीको नाम परिवर्तन गरी नेपाल समाजवादी पार्टी दर्ता गरिएको डा.भट्टराई निकट नेता रमेश पोखरेलले जानकारी दिनुभयो ।

‘यसअघि आयोगमा दर्ता रहेको समावेशी लोकतान्त्रिक पार्टीको विधान संशोधन गरेर नेपाल समाजवादी पार्टी बनाइएको छ । उक्त पार्टीले बिहिबार वैधानिकता पाएको छ’, उहाँले भन्नुभयो । उक्त पार्टीको निर्वाचन चिह्न आँखा रहेको छ । पार्टीको पहिलो बैठकबाट पदाधिकारी टुङ्ग्याउने उहाँले बताउनुभयो । ‘एक/दुई दिनमै पार्टीको बैठक बस्छ, त्यसले नेतृत्वसहित पदाधिकारीको टुङ्गो लगाउँछ’, नेता पोखरेलले भन्नुभयो ।