काठमाडौं– प्रतिनिधिसभाले अबको केही दिनभित्रै नयाँ सभामुख पाउने निश्चित भएको छ । प्रधानमन्त्री पुष्पकमल दाहाल ‘प्रचण्ड’ले प्रतिनिधिसभामा विश्वासको मत लिएलगत्तै सभामुख चुन्ने तयारी गरिएको हो । प्रतिनिधिसभा पहिलो बैठक २५ पुस (जनवरी ९) मा बस्दै छ । संविधानको धारा ९१ मा प्रतिनिधिसभा पहिलो बैठक बसेको १५ दिनभित्र सभामुख र उपसभामुख निर्वाचन गर्नुपर्ने उल्लेख छ । उक्त समय आधार मान्दा माघ १० (जनवरी २४) सम्म सभामुख चयन गरिसक्नुपर्छ ।

डिसेम्बर २५ का दिन प्रधानमन्त्री नियुक्त प्रचण्डले आगामी जनवरी १० का दिन प्रतिनिधिसभामा विश्वासको मत लिँदै छन् । त्यसलगत्तै सभामुख चयन प्रक्रिया अघि बढाउने तयारी सत्ता गठबन्धनको छ । संसद् सचिवालयका अनुसार सभामुख निर्वाचनका लागि कम्तीमा तीन दिन आवश्यक पर्छ । पहिलो दिन सभामुखका लागि सूचना जारी गर्ने, दोस्रो दिन सभामुखका लागि उम्मेदवारी दर्ता र तेस्रो दिन निर्वाचन हुनेछ । सोही अनुसार सचिवालयले तयारी गरेको हो ।

प्रधानमन्त्रीले विश्वासको मत लिएकै दिन सभामुख निर्वाचन सूचना जारी गर्ने संसद् सचिवालय तयार छ । सचिवालयका एक अधिकारीका अनुसार जनवरी १२ मा सभामुखका लागि उम्मेदवारी दर्ता र जनवरी १३ मा निर्वाचन गर्नेगरी तयारी अघि बढाइएको छ । नेकपा एमाले र नेकपा माओवादी केन्द्रसहित सात दलको गठबन्धन बन्दा प्रतिनिधिसभाको पाँच वर्षे कार्यकालका लागि आधाआधा कार्यकाल सभामुख भागबण्डा गर्ने सहमति भएको बताइन्छ ।