काठमाडौं– आईसीसी पुरुष क्रिकेट विश्वकप लिग–२ अन्तर्गत बिहिबार त्रिवि क्रिकेट मैदानमा यूएईसँग भएको वन डे इन्टरनेशनलमा नेपालले ऐतिहासिक जीत हासिल गरेको छ । खराब प्रकाशका कारण कारण डीएल (डकवर्थ लेविस) नियम अनुसार नेपालले ९ रनको जीत हासिल गरेको हो । आजको जीतसंगै नेपाल विश्वकप छनोटमा पुगेको छ । बिहीबारको खेल नेपाली क्रिकेट इतिहासकै सबैभन्दा ठूलो महत्व बोकेको खेल हो । आजको खेल जितेपछि नेपालले ३९ अंक रहेको नामिबियालाई उछिन्दै जिम्बाब्वेमा हुने एकदिवसीय विश्वकपको छनोट खेल्न पाएको छ ।

आजको खेलमा चार जना खेलाडीले आकर्षक अर्धशतक प्रहार गरे । कुशल भुर्तेल‚ भीम सार्की‚ आरिफ सेख तथा गुल्शन झाको आकर्षक अर्धशतक नेपालको जीतका लागि सहायकसिद्ध भए । उनीहरुको योगदानकै कारणले नेपाल विश्वकप क्वालिफायरमा पुग्न सफल भएको हो ।
आजको खेलमा टस जितेर पहिले ब्याटिङ गरेको यूएईले निर्धारित ५० ओभरमा ६ विकेट गुमाउँदै ३११ रनको लक्ष्य दिएको थियो । आजको खेलमा यूएईका लागि वृत्य अरविन्दले ९४ रन बनाए भने ओपनर मोहम्मद वासिमले ६३ रन बनाए ।

नेपालका लागि दीपेन्द्रसिंह ऐरीले २ विकेट लिए । ८ ओभरमा २ मेडन राख्दै उनले १९ रन खर्चिए । सोमपाल कामीले ९ ओभरमा १ विकेट लिँदै ७४ रन खर्चिए । सन्दीप लामिछानेले १० ओभर बलिङ गर्दै १ विकेट लिँदै ८० रन खर्चिए । ललित राजवंशीले भने १० ओभरमा २७ रन खर्चिएर १ विकेट लिए । ८ ओभरमा गुल्सन झाले ६३ रन खर्चिए । ४ ओभरमा कुशल मल्लले ३८ रन दिँदा आरिफ शेखले १ ओभरमा ६ रन दिए । पछिल्लो समय नेपाल उत्कृष्ट लयमा रहेको छ । यो सँगै नेपालले खेलेका १२ खेलमध्ये ११ खेलमा लगातार जीत हात पारेको छ ।