काठमाडौं– प्रधानमन्त्री पुष्पकमल दाहाल ‘प्रचण्ड’ ले सोमबार प्रतिनिधि सभाबाट विश्वासको मत लिएका छन् । सोमबारको प्रतिनिधि सभा बैठकबाट प्रधानमन्त्री प्रचण्डले विश्वासको मत लिएका हुन् । विश्वासको मतको प्रस्तावको पक्षमा १७२ र विपक्षमा ८९ मत परेको छ । एक मत तटस्थ रहेको छ । प्रतिनिधि सभाको सोमबारको बैठकमा कुल २६२ जनाको उपस्थिति थियो । सभामुख देवराज घिमिरेले प्रतिनिधि सभाको बैठकमा विश्वासको मतको पक्ष र विपक्षमा भएको मत विभाजनको परिणाम सार्वजनिक गरेका थिए । प्रधानमन्त्री प्रचण्डले नेपालको संविधानको धारा ७६ को उपधारा (४) बमोजिम प्रतिनिधि सभाबाट विश्वासको मत लिएका हुन् ।

प्रधानमन्त्री दाहाललाई नेपाली कांग्रेस, नेकपा माओवादी केन्द्र, राष्ट्रिय स्वतन्त्र पार्टी, जनता समाजवादी पार्टी नेपाल, नेकपा ९एकीकृत समाजवादी०, जनमत पार्टी, नागरिक उन्मुक्ति पार्टी, लोकतान्त्रिक समाजवादी पार्टी, राष्ट्रिय जनमोर्चा र आम जनता पार्टीका सांसद तथा स्वतन्त्र सांसद अमरेशकुमार सिंहले विश्वासको मत दिएका थिए । एमाले र राष्ट्रिय प्रजातन्त्र पार्टीले प्रस्तावको विपक्षमा मत दिएका छन् । नेपाल मजदुर किसान पार्टी तटस्थ बसेको छ । प्रधानमन्त्री प्रचण्ड नेकपा माओवादी केन्द्रका अध्यक्षसमेत हुन् । माओवादी केन्द्र ३२ सिटसहित संसद्‍को तेस्रो ठूलो दल हो ।

गत मंसिर ४ गते सम्पन्न प्रतिनिधि सभा तथा प्रदेश सभाको निर्वाचन पश्चात् प्रचण्ड पुस १० गते प्रधानमन्त्री नियुक्त भएका हुन् । सरकार गठनपछि पहिलो पटक विश्वासको मत लिने क्रममा पुस २६ गते प्रधानमन्त्रीले ऐतिहासिक बहुमत प्राप्त गरेका थिए । पहिलो पटक उनले प्रतिनिधि सभाको कुल सदस्य दुई सय ७५ मध्ये पक्षमा दुई सय ६८ मत पाएका थिए । अघिल्लो गठबन्धनभित्र राष्ट्रपति र उपराष्ट्रपति निर्वाचनको विषयमा कुरा नमिलेपछि एमाले र राप्रपा सरकारबाट बाहिरिएका थिए । दुई दलले सरकारलाई दिएको समर्थन फिर्ता गर्दै सरकार छोडेपछि प्रधानमन्त्री प्रचण्डले पुनः विश्वासको मत लिएका हुन् । प्रतिनिधि सभाको अर्को बैठक चैत १२ गते दिउँसो १ बजे बस्ने कार्यक्रम छ ।