काठमाडौं– बारा, चितवन तथा तनहुँका तीन भिन्न निर्वाचन क्षेत्रमा आगामी वैशाख १० गते हुने प्रतिनिधिसभा सदस्यको उपनिर्वाचनका लागि उम्मेदवारी दिएकाहरूको नामावली आज बुधवार प्रकाशन गरिँदै छ । निर्वाचन आयोगले आज अपराह्न ५ बजेसम्म उम्मेदवारी र त्यसविरुद्ध परेका उजुरीको जाँचबुझ गर्नेछ र आजै साँझ ६ बजेभित्र उम्मेदवारको नामावली सार्वजनिक गर्ने तालिका छ । तनहुँ क्षेत्र नम्बर १, चितवन क्षेत्र नम्बर २ र बारा क्षेत्र नम्बर २ मा वैशाख १० गते उपनिर्वाचन हुँदैछ ।

त्यसका लागि सोमबार तीनै क्षेत्रमा उम्मेदवारी दर्ता गराइएको थियो । उम्मेदवारहरूविरुद्ध उजुरीका लागि मंगलबार समय छुट्याइएको थियो ।
बिहीबार बिहान ९ बजेदेखि दिउँसो १ बजेसम्म उम्मेदवारको नाम फिर्ताका लागि आयोगले समय तोकिएको । सोही दिन दिउँसो ३ बजे उम्मेदवारको अन्तिम नामावली प्रकाशन गर्ने कार्यतालिका छ । अन्तिम नामावली प्रकाशन भएपछि उम्मेदवारले चुनाव चिह्न पाउनेछन् ।

तीन निर्वाचन क्षेत्र उपनिर्वाचनमा ६९ जनाको उम्मेदवारी

वैशाख १० गते हुने तीन प्रतिनिधि सभा सदस्य निर्वाचन क्षेत्रमा उपनिर्वाचनका लागि ६९ जनाको उम्मेदवारी परेको छ। बारा–२, चितवन–२ र तनहुँ–१ मा निर्धारित उपनिर्वाचनका लागि सोमबार उम्मेदवारी मनोनयन गर्ने कार्यक्रम रहेकोमा उक्त सङ्ख्यामा उम्मेदवारी परेको हो । निर्वाचन आयोगका अनुसार बारा–२ मा सबैभन्दा बढी ३६ जनाले उम्मेदवारी दर्ता गराएका छन् । जसमध्ये १२ जनाले राजनीतिक दलबाट र २४ जनाले स्वतन्त्र निर्वाचन चिह्न पाउने गरी उम्मेदवारी दर्ता गराएका छन् ।

चितवन–२ मा २४ जनाले उम्मेदवारी दर्ता गराएकोमा १२ जना राजनीतिक दलबाट र १२ जना स्वतन्त्र उम्मेदवार छन् । निर्वाचन आयोगका सहायक प्रवक्ता सूर्यप्रसाद अर्यालका अनुसार तनहुँ–१ मा नौ जना उम्मेदवारले मनोनयन दर्ता गराएका छन् । सो क्षेत्रमा स्वतन्त्र उम्मेदवार छैन । उपनिर्वाचन कार्यक्रमबमोजिम चैत २३ गते उम्मेदवारको अन्तिम नामावली प्रकाशन गर्ने तथा सोही दिन उम्मेदवारलाई निर्वाचन चिह्न प्रदान गर्ने कार्यक्रम छ । वैशाख १० गते बिहान ७ बजेदेखि बेलुकी ५ बजेसम्म मतदान हुनेछ ।