काठमाडौं– सरकारले सङ्घीय संसद्मा पेस गरेको आर्थिक वर्ष २०८०–८१ को नीति तथा कार्यक्रम राष्ट्रिय सभाबाट पारित भएको छ । राष्ट्रियसभाको मंगलबारको बैठकले उक्त नीति तथा कार्यक्रम बहुमतले पारित गरेको हो । राष्ट्रपति रामचन्द्र पौडेलले जेठ ५ गतेसंघीय संसदको संयुक्त बैठकमा सरकारको नीति तथा कार्यक्रम प्रस्तुत गरेका थिए । जसलाई राष्ट्रिय सभाको मंगलबारको बैठकले बहुमतले पारित गरेको राष्ट्रिय सभा अध्यक्ष गणेश तिमल्सिनाले जानकारी दिए । तिमल्सिनाले भने– ‘आर्थिक वर्ष २०८०–८१ का लागि नेपाल सरकारको नीति तथा कार्यक्रमबहुमतले पारित भएको घोषणा गर्दछु ।’

बैठकले सांसद तुलसाकुमारी दाहाल, बिमला घिमिरे र डा. बिमला राई पौड्यालले राखेका संशोधन प्रस्ताव बहुमतले अस्वीकृत गरेको थियो । त्यसअघि प्रधानमन्त्री पुष्पकमल दाहाल ‘प्रचण्ड’ले नीति कार्यक्रममाथि सांसदले राखेका जिज्ञासाको जवाफ दिएका थिए । राष्ट्रियसभाको अर्को बैठक यही जेठ १४ गते दिउँसो १ बजे बस्नेछ ।