बझाङ– मंगलबार दिउँसो बझाङमा भएको जीप दुर्घटनामा परेर गम्भिर घाइते भएका दुई जनाको निधन भएको छ । दुर्घटनामा परेर सुदूरपश्चिम प्रदेशका आन्तरिक मामिला तथा कानून मन्त्री पृथ्वी बहादुर सिंहकी धर्मपत्नी ५० वर्षीया अमृता सिंह तथा भाउजू ६० वर्षीया जयादेवी सिंहको उपचारको क्रममा निधन भएको प्रहरीले जनाएको छ । दुर्घटनामा गम्भीर घाइते भएका उनीहरुको प्राथमिक स्वास्थ्य केन्द्र, देउरामा उपचारकै क्रममा मृत्यु भएको हो ।

केदारस्युँ गाउँपालिका–१ का अध्यक्ष वीरबहादुर भण्डारीका अनुसार चिकित्कसले दुई जनाको मृत्यु भएको घोषणा गरेका हुन् । मन्त्री सिंहसहित घाइते तीन जनालाई हेलिकोप्टरमार्फत कोहलपुर लगिएको छ । दुर्घटनामा परेका मन्त्री सिंहको अवस्था पनि गम्भिर भएको बताइन्छ । मन्त्री सिंहसहित जीपका चालक ३५ वर्षीय धर्मराज जोशी तथा पीएसओ प्रहरी सहायक हवल्दार दीपक भण्डारीलाई उपचारका लागि कोहलपुर मेडिकल कलेज लगिएको हो ।

आज दिउँसो बझाङको केदारस्यु गाउँपालिका–१ झारछडास्थित जयपृथ्वी राजमार्गमा मन्त्री सवार जीप दुर्घटनामा परेको थियो । डडेल्धुराबाट चैनपुर बझाङतर्फ आउँदै गरेको सु प प्र ०१००१ झ ४८० नम्बरको जीपनमा सुदूरपश्चिम प्रदेश सरकारका आन्तरिक मामिला तथा कानुन मन्त्री पृथ्वीबहादुर सिंहसहित ५ जना सवार थिए । गाडी सडकबाट करिब ५० मिटर तल कालङ्गा नदी किनारमा खसेको थियो ।