काठमाडौं– नेपालले मलेसियामा जारी एसीसी यू–१६ इस्ट जोन कपको उपाधि जितेको छ । मंगलबार भएको फाइनलमा नेपालले मलेसियालाई २२१ रनको फराकिलो अन्तरले पराजित गरेको हो । नेपालले दिएको २५३ रनको लक्ष्य पछ्याउन मैदानमा उत्रिएको मलेसियाको टोली १४.५ ओभरमा जम्मा ३१ रनमा अलआउट भएको हो ।

मलेसियालाई सस्तैमा समेट्ने क्रममा नेपालका अभिषेक तिवारीले उत्कृष्ट बलिङ गरे । तिवारी एक्लैले ५ विकेट लिएका छन् । सन्तोष यादबले ३ तथा सागर गैरे र अशोक धामीले समान एक विकेट हात पारे ।

मलेसियाका ५ जना ब्याट्सम्यानले खाता खोल्न सकेनन् । मुहम्मद अक्रमले सर्वाधिक १० रन बनाए । मलेसियाले पहिलो ओभरमै २ विकेट गुमाएको थियो । अभिशेकले ६ ओभरमा एक मेडन राख्दै ७ रन खर्चिए । ३ ओभर बलिङ गरेको सन्तोषले २ मेडन राख्दै ९ रन दिएका थिए ।

मलेसियाको बायुमास ओभलमा खेलिएको फाइनलमा टस जितेर पहिला ब्याटिङ गर्ने निर्णय गरेको नेपालले निर्धारित ३५ ओभरमा ८ विकेटको क्षतिमा २५२ रन जोडेको थियो । नेपालका लागि शीर्षक्रमका ब्याट्सम्यान नरेन भट्टले ८९ बलमा १० चौका तथा दुई छक्कासहित १ सय १२ रनको अविजित शतकीय इनिङ खेले ।

ओपनर निरज यादव ४९ बलमा ६ चौकासहित ४७ रन बनाए भने अर्का ओपनर सूर्यांषु कोइरालाले १८ रन, सन्तोष यादवले २९, अशोक धामीले ११ तथा दिपु कुमारले ५ रन जोडे । मलेसियाका मोहम्मद अक्रमले ७ ओभरमा ४५ रन खर्चेर ३ विकेट लिए ।