लण्डन– गैरआवासीय नेपाली संघ बेलायत (एनआरएनए यूके) को अध्यक्षमा हितकाजी गुरुङ निर्वाचित भएका छन् । शनिवार मध्यराति सकिएको अनलाइन मतदानमा गुरुङले कुल १४७९ मत ल्याएर सन् २०२३–२५ कार्यकालको नेतृत्व लिन सफल भएका हुन् । अध्यक्ष पदमा निर्वाचित गुरुङ तमुधिं यूकेका पूर्व अध्यक्षसमेत हुन् । गुरुङका प्रतिष्पर्धी दिनेश घिमिरेले १२५४ तथा डा. नारायण कँडेलले ९०५ मत ल्याएको अनलाइन मतदान गर्ने कम्पनी भेरोले घोषणा गरेको छ ।

स्कटल्याण्डबाट प्रतिनिधित्व गर्ने उपाध्यक्षमा मनिष खत्री विजयी भएका छन् । दुई उपाध्यक्षमा रविन्द्र कँडेल र सुरेश परियार तथा महासचिवमा गोविन्द खरेल निर्वाचित भएका छन् । उपाध्यक्ष निर्वाचित रविन्द्र कँडेलले १४५६ तथा सुरेश परियारले १३१२ मत ल्याएर विजयी भएका छन् । उपाध्यक्षका अन्य प्रतिष्पर्धीहरुमध्ये ज्ञानेन्द्र आलेले ८७८, कर्मा पहाडी शेर्पाले ८७६ तथा अमन गौचनले ४२९ मत ल्याएर पराजित भएका छन् । स्कटल्याण्डबाट प्रतिनिधित्व गर्ने उपाध्यक्षमा मनिष खत्रीले १६१५ मत ल्याएर विजयी भए भने उनीसंग पराजित राम बगालेले १५३० मत ल्याए ।

महासचिवमा गोविन्द शर्मा खरेलले १५८१ मत ल्याएका छन् भने उनका प्रतिद्वन्दि बालकृष्ण भुसालले १५३७ मत ल्याएका छन् । त्यसैगरि, सह-कोषाध्यक्षमा हेमकुमार गुरुङ र युवा संयोजकमा सुजित शाही निर्वाचित भएका छन् । सह-कोषाध्यक्ष विजयी गुरुङले १८७५ मत ल्याएका छन् भने उनका प्रतिस्पर्धी सुमन शर्माले १४३८ मत ल्याए । युवा संयोजकमा सुजित शाहीले १५७२ मत ल्याएर विजयी भए भने उनका प्रतिद्वन्दि वीरेन्द्र नेपालले १३५४ मत ल्याए । आइसीसी सदस्यहरुमा चन्द्र गुरुङ, सुनिलबाबु खड्का, विष्णु चालिसे र दिलरस गुरुङ निर्वाचित भएका छन् । दिलरस गुरुङले १८६३, सुनिलबाबु खड्का १६९८, चन्द्र गुरुङ १६९० र विष्णु चालिसेले १६४३ मत ल्याएर विजयी भएका छन् ।

आइसीसी पराजित उम्मेदवारद्वय मोहन कार्की र डा.सुनिल साहले क्रमशः १३१२ र ९०५ मत ल्याएका छन् । इङ्ल्याण्ड राज्य परिषद अध्यक्षमा शम्भुप्रसाद अर्याल १५५५ मत ल्याएर विजयी भए भने उनका प्रतिद्वन्दि सन्तोषकुमार सुवेदी ८५८ मत मात्र ल्याएर हार व्यहोरे । स्कटल्याण्ड राज्य परिषद अध्यक्षमा दिवाकर पाण्डेले २४५ मत ल्याएर विजयी भए भने उनका प्रतिद्वन्दि उज्वल कार्की ५ मतको झिनो अन्तर २४० मतसहित पराजित भए । एनआरएनए यूके निर्वाचनमा झण्ड ९० प्रतिशत मत खसेको थियो । नवनिर्वाचित कार्यसमितिको शपथ आज आइतबार हुने कार्यक्रम छ । शनिबार बिहान ६ बजे प्रारम्भ भएर मध्यरातमा सम्पन्न अनलाइन मतदानमा कुल ३ हजार ७ सय २८ मत (८९.१२ प्रतिशत) खसेको निर्वाचन अनुगमनकर्ता एनआरएनए युरोप क्षेत्रीय उपसंयोजक दयानिधि सापकोटाले जानकारी दिए । कुल मतदाता ४ हजार १ सय ८३ थिए । सापकोटाका अनुसार खसेको मतमध्ये इंग्ल्याण्डमा ३ हजार ८५ (८७.७ प्रतिशत), स्कटल्याण्ड ४९२ (९८.६ प्रतिशत), नर्दन आयरल्याण्ड र वेल्समा १५१ (९०.४ प्रतिशत) मत खसेको थियो ।