काठमाडौं– सत्तारुढ नेपाली कांग्रेसका सांसद डा.सुनिल शर्मा पक्राउ बिहिवार परेका छन् । सांसद शर्मालाई सीआईबीले शैक्षिक प्रमाणपत्र छानबिनका लागि पक्राउ गरेको नेपाल प्रहरी केन्द्रीय प्रहरी प्रवक्ता कुबेर कडायतले बताएका छन् । शर्मा काठमाडौंबाट पक्राउ परेका हुन् । प्रवक्ता कडायतका अनुसार सांसद शर्मालाई शैक्षिक प्रमाणपत्रबारे छानबिन गर्नका लागि नियन्त्रणमा लिइएको हो । कांग्रेस नेता अजय बाबु सिवाकोटीले सामाजिक सञ्जालमार्फत उनी पक्राउ परेको जानकारी गराउँदै शर्माको पक्राउबारे सरकारमाथि प्रश्न समेत उठाएका छन् ।

यसैबीच, नेपाली कांग्रेसले सांसद सुनिल शर्मा पक्राउबारे सभामुखको पत्रपछि मात्रै औपचारिक धारणा सार्वजनिक गर्ने भएको छ । बिहीवार बसेको संसदीय दलको कार्यसमितिको बैठकपछि प्रमुख सचेतक रमेश लेखकले शर्मालाई किन पक्राउ गरिएको हो ? भन्ने जानकारी लिइरहेको भन्दै सभामुखबाट औपचारिक जानकारी प्राप्त भएपछि मात्रै पार्टीको धारणा सार्वजनिक गरिने बताए । सचेतक लेखकको भनाइ छ – ‘के विषयमा, केका लागि, किन पक्राउ गरेका भन्ने कुराको हामी जानकारी लिईराखेका छौं । केका लागि, किन पक्राउ गरेको थाहा लागेपछि यो बारेमा आफ्नो धारणा सार्वजनिक गछौं ।’ उनले सभामुखबाट जानकारी लिएपछि पार्टीले आफ्नो आधिकारिक धारणा सार्वजनिक गर्ने बताए । आज बस्ने संसदीय दलको बैठकका एजेन्डा तय गर्न बिहिवार कार्यसमितिको बैठक बसेको थियो । संसदीय दलको बैठक आज दिउँसो १ बजे नयाँ वानेश्वरस्थित संसद भवनको लोत्से हलमा बस्ने छ ।

उता, मेडिकल व्यवसायी दुर्गा प्रसाईँले सांसद सुनिल शर्मालाई नेपाली कांग्रेसका सभापति शेरबहादुर देउवाले फसाएको आरोप लगाएका छन् । बिहिवार सांसद शर्मा पक्राउ परेपछि सञ्चारकर्मीहरुसँग कुराकानी गर्दै कांग्रेस सभापति शेरबहादुर देउवा र अर्थ मन्त्रीप्रकाश शरण महतले नियोजित रुपमै शर्मालाई फसाएको आरोप लगाएका हुन् । प्रसाईँको भनाइ छ – ‘सुनिल शर्मालाई फसाउन शेरबहादुर देउवा पनि मिल्नु भएको छ । अर्थमन्त्रीको पूरा हात छ । म अर्थमन्त्रीलाई के भन्छु भने सुनिल शर्माको मुख थुनेर केहि हुनेवाला छैन । मिनबहादुर जस्ता, दुर्गा प्रसाईँ जस्ता मानिसहरु धेरै छन् ।’ प्रसाईँले मारवारीसँग सहकार्य गरेर तस्करी गर्ने र नेपाली व्यापारीलाई देशबाट खेद्ने रणनीति नेपाली कांगे्रसको रहेको जिकिर गरे ।