काठमाडौं– एशिया कप क्रिकेटको उद्घाटन खेलमा पाकिस्तानले नेपाललाई २ सय ३८ रनले पराजित गरेको छ । भरखरै सम्पन्न भएको खेलमा ३४३ रनको लक्ष्य पछ्याउन मैदानमा उत्रिएको नेपाली टीम १०४ रनमै अलआउट भएको हो । पाकिस्तानले दिएको विशाल लक्ष्य पछ्याउने क्रममा नेपाललाई पहिलो ओभरमै दुई ठूला झट्का लागेको थियो । कुशल भुर्तेल र रोहित पौडेल पहिलो ओभरमै आउट भए ।

नेपाल को १४ रनको स्कोरमा आशिफ शेखको रुपमा तेस्रो विकेट गुमाएपछि केही समय खेलमा फर्कियो । तर ७३ रनको स्कोरमा आरिफ शेख आउट भएपछि विकेट पतनको क्रम प्रारम्भ भयो । ८२ रनको स्कोरमा सोमपाल कामी पाँचौं विकेटको रुपमा आउट भए भने ९० रनको स्कोरमा दिपेन्द्र सिंह ऐरी पनि आउट भए । लगत्तै ९१ रनको स्कोरमा गुल्शन झा आउट भए भने सन्दीप लामिछाने खातै नखोली फर्किउ । नवौं विकेटको रुपमा १०४ रनको स्कोरमा कुशल मल्ल भए भने लगत्तै ललित राजवंशी पनि आउट हुँदै नेपालको पुरै टीम अलआउट भयो ।

नेपालका लागि कुशल भुर्तेलले ८ रन, आशिफ शेखले ५ रन, आरिफ शेखले २६ रन, सोमपाल कामीले २८ रन, गुल्सन झाले १३ रन, दिपेन्द्र सिंह ऐरीले ३ रन, कुशल मल्लले ६ रन, करण केसीले ७ रनको योगदान दिए । कप्तान पौडेल, सन्दीप लामिछाने तथा ललित राजवंशी शून्य रनमा आउट भए ।

पाकिस्तानका लागि शादाब खानले सर्वाधिक चार विकेट लिए भने शाहीन शाह अफ्रीदी तथा हरिश रौफले समान दुई विकेत तथा नसीम शाह तथा मोहम्मद नवाजले समान एक विकेट लिए । नेपालले आफ्नो दोस्रो खेल आगामी सोमबार भारतविरुद्ध खेल्दैछ ।