काठमाडौं– पेप्सिकोलामा बसले गुडिरहेका ३ वटा सवारी साधनलाई ठक्कर दिँदा एकजनाको मृत्यु भएको छ । दुर्घटनामा अन्य सात जना घाइते भएका छन् । दुर्घटनामा शसस्त्र प्रहरी बल नं। २० बिपद् उद्दार उपत्यका गण, सिनामंगलमा कार्यरत सशस्त्र प्रहरी जवान उषा थापाको निधन भएको हो । स्कुटरमा रहेकी सशस्त्र प्रहरी जवान थापाको उपचारको क्रममा मृत्यु भएको हो । उनीसँगै स्कुटरमा सवार घाइते जवान स्वस्थानी खड्काको सिभिल अस्पतालमा उपचार भइरहेको छ ।

काठमाडौं उपत्यका ट्राफिक प्रहरी कार्यालयका प्रवक्ता एवम् प्रहरी वरिष्ठ उपरीक्षक राजेन्द्रप्रसाद भट्टका अनुसार जडीबुटीबाट पेप्सीकोला आउँदै गरेको बसले बोलेरो, मोटरसाइकल र स्कुटरलाई ठक्कर दिएको हो । घटनाबारे थप अनुसन्धान भइरहेको भट्टले बताउनुभयो । उहाँका अनुसार बा ३ ख ४८४८ नम्बरको बसले विपरीत दिशातर्फबाट आएको बा ६ च ५३४२ नम्बरको बलेरो गाडी एक आपसमा ठोकिँदा बा प्र ०२ ०३७ प ५३११ नम्बरको स्कुटर र बा प्र ०२ ०४१ प ४८३८ नम्बरको मोटरसाइकलसहित ठोक्किई भएको सवारी दुर्घटना भएको हो । घाइतेलाई उपचारका लागि मीनभवनस्थित सिभिल अस्पतालमा लगिएको जनाइएको छ। दुर्घटना बिहान ८ बजेतिर भएको र बस चालकलाई प्रहरीले नियन्त्रणमा लिइसकेको जनाएको छ ।