आज विजया दशमी

-- नेपाली टाईम्स अष्ट्रेलिया ?>

काठमाडौं– बडादशैँ अन्तर्गत आज मंगलबार विजया दशमी । दुर्गापक्षको मुख्य दिन आज नवदुर्गाको प्रसादका रूपमा मान्यजनको हातबाट शुभ साइतको प्रतीक रातो टीका एवं समृद्धिको प्रतीक जमरा लगाइँदैछ । घटस्थापनाका दिन स्थापना गरिएको घडाबाट वैदिक विधिपूर्वक अभिषेक गरी विजयादशमीको टीका लगाइन्छ ।

आश्विन शुक्ल दशमीका दिनमा मनाइने विजया दशमी पर्व आज हर्षोल्लासका साथ मान्यजनबाट दुर्गा भवानीको प्रसादस्वरूप टीका, जमरा थापेर मनाइन्छ । आज नभ्याउनेले कोजाग्रत पूर्णिमासम्म मान्यजनबाट टीका ग्रहण गर्न सक्नेछन् । नेपाल पञ्चाङ्ग निर्णायक विकास समितिले आज बिहान ११ः०२ बजे (नेपालमा) को साइत उत्तम रहेको जनाएको छ । टीका प्रसादग्रहण गर्न साइत खोज्नेका लागि यो साइत उत्तम भए पनि विजया दशमी आफैँमा शुभ दिन भएकाले आज टीका लगाउन सामान्य मानिसले साइत खोज्नु नपर्ने मान्यतासमेत रहेको छ । त्यसअघि दुर्गा बिसर्जनका लागि समितिले १० बजेर ३७ मिनेटको साइत तोकेको छ ।