काठमाडौं– विश्वकप फाइनल एसिया छनोटको आफ्नो पहिलो खेलमा नेपालले उत्कृष्ट जीत हासिल गरेको छ । सिंगापुरले दिएको १४६ रनको विजयी लक्ष्यलाई नेपालले दुई विकेटको क्षतिमा २१ बल बाँकी छँदै पुरा गरेको हो । योसंगै नेपालले आजको खेल ८ विकेटले जितेको हो । नेपालको जीतमा ओपनर कुशल भूर्तेलको महत्वपूर्ण भूमिका रह्यो । उनले विष्फोटक व्याटिङ गर्दै ७४ रन बनाए ।

भूर्तेलले ४८ बलमा ८ चौका तथा दुई छक्काको सहयोगमा ७४ रन बनाएका हुन् । उनले पहिलो विकेटका लागि २७ रनमा आउट भएका आशिफ शेखसंग ८४ रनको साझेदारी गरेका थिए । कप्तान रोहित पौडेलले २४ बलमा अविजित ३५ रन बनाए । उनले दुई चौका तथा दुई छक्काको सहयोगमा यो रन बनाएका हुन् । भूर्तेल आउट भएपछि मैदानमा उत्रिएका कुशल मल्लले पहिलो बलमै छक्का प्रहार गरेर टीमलाई जीत दिलाएका हुन् । नेपालले १६.३ ओभरमा दुई विकेटको क्षतिमा १४७ रन बनाउँदै यो खेल जितेको हो ।

आजको खेलमा टस जितेर सिंगापुरले पहिला ब्याटिङ गर्ने निर्णय गरेको थियो । कीर्तिपुरस्थित टीयू क्रिकेट मैदानमा भरखरै सम्पन्न पहिलो इनिङमा सिंगापुरले ९ विकेटको क्षतिमा १४५ रन बनाएको हो । सिंगापुरका ओपनर रोहन रंगराजनले सर्वाधिक ४६ रन बनाए भने मनप्रीत सिंहले २४ तथा आर्यवीर चौधरीले ३७ रनको योगदान दिए । नेपालका अभिनाष बोहोराले सर्वाधिक तीन विकेट लिए भने करण केसी, सन्दीप लामिछाने तथा गुलसन झाले समान दुई विकेट लिए ।

एसिया छनोटमा एसियाका आठ देश सहभागी खेलमा चार–चार टोलीलाई दुई समूहमा विभाजन गरिएको छ । १९ कात्तिकसम्म सञ्चालन हुने प्रतियोगितामा दुवै समूहबाट विजेतादुई टोली सेमिफाइनल पुग्नेछन् । नेपाली टोलीमा आज सन्दीप लामिछाने पनि खेलिरहेका छन् । केही दिनअघि सम्पन्न त्रिकोणात्मक सीरीज नखेलेका उनी एशिया कप छनोट खेलमा भने सहभागी भएका हुन् । क्यानले खेलाडी परिवर्तन गर्दै नेपाली टोलीमा ललित राजवंशीको स्थानमा सन्दीप आएका हुन् । अरु खेलाडी भने परिवर्तन भएको छैनन् ।