काठमाडौं– राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले जनताले शान्तिपूर्ण ढङ्गले हिँडडुल गर्न, भेला हुन र विरोध प्रदर्शन गर्न पाउनु पर्ने बताएका छन् । दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाऊँ महाअभियान’ को समर्थनमा निस्किएकाहरुलाई प्रहरीले धमाधम पक्राउ गर्न थालेपछि राप्रपाका लिङ्देनको यस्तो प्रतिक्रिया आएको हो ।

सामाजिक सञ्जाल फेसबुकमा लिङ्देनले लेखेका छन्– ‘हक विपरित आज काठमाडौंमा भईरहेको धरपकड र नजरबन्द जस्ता घट्नाहरु अलोकतान्त्रिक तथा जनताको मौलिक हक विरुद्धका काम हुन् ।’ ‘धरपकड र कुनै पनि प्रकारको दमनले समस्याको समाधान निस्कँदैन । सरकारले आफुलाई तत्काल सच्याओस ।’

यता, एमाले अध्यक्ष केपी शर्मा ओलीले चेतना नभएका मुर्खहरुले मात्र जनताले काम नलाग्ने भनेर फ्याँकेको राजतन्त्र मान्ने टिप्पणी गरेका छन् । शुक्रबार काठमाडौंमा युवा संघको पूर्ण बैठकलाई सम्बोधन गर्दै ओलीले यस्तो टिप्पणी गरेका हुन् । नागरिक सर्वोच्चता स्वीकार नगर्ने, एउटा व्यक्तिमा सार्वभौमसत्ता हुनुपर्छ भन्ने कुरा चेतना नभएर मुर्खता भएको उनले बताए । ओलीले कतिपय देशले ऐतिहासिक कारणले स्वीकार गरेको हुनसक्ने बताउँदै नेपालमा राजतन्त्र काम लाग्दैन भनेर जनताले फालेको बताए ।

‘कठैबरी, नागरिक सर्वोच्ता स्वीकार गर्न नसक्ने, एउटा व्यक्तिमा सर्वभौमसत्ता हुनुपुर्छ भन्ने पनि चेतना हो र ? त्यो त मूर्खता हो ।’ उनले यो देशमा २० सालभन्दा अगाडिसम्म एउटा बाटो नबन्नुको कारण के ? अनि विकास हुनै नसक्नुको कारण के ? भन्ने प्रश्नसमेत गरे । २४० वर्षसम्म नेपालमा राजाहरुले केही पनि नगरेको बताउँदै उहाँले देश विकास नहुनुका पछाडि राजतन्त्र नै जिम्मेवार रहेको दाबी समेत गरे ।

मेडिकल व्यवसायि दुर्गा प्रसाईंले बिहिवार काठमाडौंको बल्खु केन्द्रित प्रदर्शन गरेका थिए भने आज तीनकुनेमा प्रदर्शन गर्ने घोषणा गरेका थिए । यद्यपि, आज बिहानैदेखि उनलाई प्रहरीले भक्तपुरको ठिमीस्थित निवासमै नजरबन्दमा राखेको छ भने तीनकुने क्षेत्रबाट उनका समर्थकहरुलाई प्रहरीले नियन्त्रणमा लिने क्रमलाई जारी राखेको छ ।