जनकपुरधाम- भारतको अयोध्यामा भगवान रामको प्राणप्रतिष्ठा गरिएको खुसीयालीमा जनकपुरधामस्थित जानकी मन्दिरमा सवा लाख दीप बालिएको छ । जानकी मन्दिर व्यवस्थापन पक्ष र हिन्दूवादी संगठनले सोमबार साँझ सवा लाख दीप बालेर दीपोत्सव मनाएको हो । त्यसलगायत जनकपुरधाम तथा ग्रामीण क्षेत्रको घरघरमा दीप तथा झिलिमिली बत्ती बालेर दीपावली मनाएको छ ।

हिन्दु धर्मावलम्बीहरूले जनकपुरधामलगायत मधेश प्रदेशको सबैजसो जिल्लाका विभिन्न ठाउँमा प्राण-प्रतिष्ठाको अवसर पारेर मठमन्दिरमा दीपोत्सव मनाउनुका साथै आकर्षक ढङ्गले सजाइएको छ । ठाउँ-ठाउँमा जय श्रीरामको झन्डालगायत शोभायात्रा कारण गाउँटोल सुन्दर तथा मनमोहक देखिएका छन् । मठमन्दिरमा रामधुन, अष्टयाम, भजनकीर्तनसमेतको आयोजना गरिएको छ ।

भगवान राम पाँचसय वर्षपछि आफ्नो घरमा स्थापित भएको खुसीयालीमा सनातन धर्मावलम्बी धेरै नै हर्षित देखिएको छ । आयोध्या र नेपालबीच धार्मिक तथा साँस्कृतिकसँगै पारिवारिक सम्बन्ध भएकाले भगवान रामको प्राणप्रतिष्ठाको अवसरमा दिप प्रज्जवलन गरी स्वागत गरिएको छ ।

लामो प्रतिक्षापछि अयोध्यामा नवनिर्मित राम मन्दिरको प्राणप्रतिष्ठा भएको खुसीयालीमो जनकपुरधाम उपमहानगरपालिका, क्षीरेश्वरनाथ, सहिदनगर, औरहीलगायत मधेश प्रदेशका दुई दर्जनभन्दा बढी स्थानीय तहले सोमबारका लागि सार्वजनिक बिदा दिएको थियो ।