पपुवा न्यूगिनीविरुद्धको खेलमा नेपालको रोमाञ्चक जीत, फाइनलमा प्रवेश

-- नेपाली टाईम्स अष्ट्रेलिया ?>

काठमाडौं– हङकङमा जारी त्रिकोणात्मक टी–२० सीरीजको भरखरै सम्पन्न खेलमा नेपालले पपुवा न्यूगिनीलाई ८५ रनले पराजित गरेको छ । १९९ रनको विशाल लक्ष्य पछ्याउन मैदानमा प्रवेश गरेको पपुवा न्यूगिनीको टीम ११३ रनमै अल आउट भएको हो । नेपालका लागि आजको खेलमा कुशल भूर्तेलले सर्वाधिक चार विकेट लिए । त्यस्तै प्रतिस जिसीले दुई विकेट लिए भने आकाश चन्द र गुल्शन झाले एक-एक विकेट लिए ।

त्यसअघि नेपालका कुशल भूर्तेल र सन्दीप जोरालाई विष्फोटक शैलीमा अर्धशतक बनाएपछि नेपालले छ विकेटको क्षतिमा १९८ रन बनाउन सफल भएको थियो । कुशलले ३९ बलमा चार चौका तथा चार छक्काको सहयोगले ५९ रन बनाए भने सन्दीपले २६ बलमै तीन चौका तथा चार छक्काको सहयोगले ५६ रन बनाए । आजको जीतसंगै नेपाल यो सीरीजको फाइनलमा प्रवेश गरेको छ । फाइनल खेल भोलि मंगलवार खेलिँदैछ ।