काठमाडौं– नेपालले आयरल्याण्ड ‘ए’ लाई ६ विकेटले पराजित गरेको छ । आयरल्याण्ड ‘ए’ ले दिएको १२२ रनको लक्ष्य नेपालले २३ बलअघि नै चार विकेट गुमाएर भेट्टाउन सफल भयो । कीर्तिपुरस्थित त्रिवि क्रिकेट मैदानमा खेलिएको खेलमा नेपालका लागि ओपनर कुशल भूर्तेलले अविजित ३७ रनको योगदान दिए । उनले ३२ बलमा चार चौका प्रहार गरे ।

सन्दीप जोराले ३५ बलमा तीन चौका तथा दुई छक्काको सहयोगले ३६ रन बनाए भने दिपेन्द्र सिंह ऐरीले अविजित रहँदै १२ बलमा २० रन बनाए । उनले दुई चौका तथा एक छक्का प्रहार गरे । ओपनर आशिफ शेखले ११ बलमा १६ रन बनाए । कप्तान रोहित पौडेल शून्य रनमै आउट भएको आजको खेलमा गुलशन झाले चार रन बनाए ।

त्यसअघि आयरल्याण्ड ‘ए’ ले टस जितेर पहिला ब्याटिङ गर्दै नेपाललाई १२२ रनको लक्ष्य दिएको थियो । आयरल्याण्डको टीम २० ओभरमा अल आउट हुँदै १ सय २१ रन बनाएको थियो । आयरल्याण्डका लागि स्टेफेन डोहेनीले सर्वाधिक ४६ रन बनाएका थिए भने थोमस मायेज र लियाम म्याकार्थीले १६–१६ रन बनाएका थिए । नेपाली बलर ललित राजबंशी, गुलशन झा र कुशल भुर्तेलले २–२ विकेट लिए भने करण केसी र कुशल मल्लले एक–एक विकेट लिएका थिए ।