काठमाडौं— प्रमुख प्रतिपक्षी दल नेपाली कांग्रेसले भूकम्पपीडितप्रति राजनीतिक आस्थाका आधारमा व्यवहार गरिएको भन्दै आज बुधवारको संसद बैठकमा गम्भीर आपत्ति जनाएको छ ।
व्यवस्थापिका–संसद् बैठकको विशेष समयमा कांग्रेस सांसद अर्जुननरसिंह केसीले भूकम्पपीडित जनताको जीवनमा पुन:निर्माण प्राधिकरण र सरकारले खेलवाड गरेको आरोप लगाउँदै उनीहरूका समस्याप्रति प्राधिकरण गम्भीर नभएको दावी गरेका छन् ।
नेता केसीले राजनीतिक आग्रह र पूर्वाग्रहबाट प्रेरित भएर वास्तविक पीडितप्रति बेवास्ता भएको आरोप लगाएका हुन् । भूकम्पपीडित ४७ हजारभन्दा बढी परिवारलाई सहायता रकम प्रदान गर्न सम्झौता भएको, तर दुई हजार जतिले मात्र त्यस्तो रकम पाएका बताउँदै केसीले वर्षायाम प्रारम्भ भइसक्दा पनि पीडितहरु पालमा नै बस्न बाध्य भएकाले अविलम्ब सहयोग रकम उपलब्ध गराउन र पुन:निर्माणका काम द्रूतगतिमा अघि बढाउन माग समेत गरेका छन् ।
सांसद गुरुप्रसाद बुर्लाकोटीले धादिङ जिल्लाका ४० प्रतिशत भूकम्पपीडित सर्वेक्षणमा छुटेका, घर भत्केकालाई पनि आंशिक क्षति भनेर उल्लेख गरिएकोमा आपत्ति जनाउँदै पुन: सर्वेक्षण गर्नुपर्ने माग गरे । सांसद कृष्ण धितालले भूकम्पबाट अतिप्रभावित गोरखाका कैयौं जनताले अनुदान रकम नपाएका, ऋण सहायता पनि नपाएका भन्दै पीडितपरिवारलाई तत्काल सहयोग रकम उपलब्ध गराउन माग गरे । विशेष समयमा भूकम्पपीडितका समस्या, उनीहरूलाई समयमै राहत दिनेलगायत मुलुकको समसामयिक विषयमा सदन र सरकारको ध्यानाकर्षण गराउनेमा सांसदहरू मोहनबहादुर बस्नेत, प्रेम सुवाल, नवीन्द्रराज जोशी, डा सुवोधकुमार पोखरेल, राजन भट्टराई, लोकमणि ढकाल, मीलनकुमारी राजवंशी र श्याम श्रेष्ठ थिए ।