काभा महिला भलिबल लिगको उपाधि भारतलाई

-- नेपाली टाईम्स अष्ट्रेलिया / प्रकाशित मिति : बिहिबार, साउन २४, २०८१

काठमाडौं– काठमाडौंमा जारी काभा महिला भलिबल लिगको उपाधि भारतले जितेको छ । बुधवार सम्पन्न फाइनल खेलमा भारतले नेपाललाई ३–२ को सेटले पराजित गर्दै उपाधि जितेको हो । नेपालले खेलको पहिलो सेटमा जित हासिल गरेर अग्रता लिए पनि भारतले उत्कृष्ट खेल खेल्दै आकर्षक कमब्याक गरेको थियो । दोस्रो सेट भारतले जितेको थियो भने तेस्रो सेट नेपालले र चौथो सेट भारतले जितेको थियो ।

त्यस्तै पाँचौं सेट भने भारतले १५–५ ले सजिलै जितेको थियो । योसँगै नेपाल प्रतियोगिताको उप–विजेता बनेको छ । इरानले आजै सम्पन्न तेस्रो स्थानको खेलमा श्रीलंकालाई ३–० को सोझो सेटमा पराजित गर्दै तेस्रो स्थान हासिल गरेको छ । पाँच देशले भाग लिएको यस प्रतियोगितामा श्रीलंका चौथो भएको छ भने माल्दिभ्स लिग चरणबाटै बाहिरिएको थियो ।