चितवनको घुमाउनेमा बस दुर्घटना, १० यात्रु घाइते

-- नेपाली टाईम्स अष्ट्रेलिया / प्रकाशित मिति : आइतवार, भदौ ९, २०८१

चितवन- नारायणगढ-मुग्लिन सडकखण्ड अन्तर्गत भरतपुर महानगरपालिका-२९, घुमाउनेमा यात्रुबाहक बस दुर्घटनामा परेको छ । महेन्द्रनगरबाट काठमाडौंतर्फ जाँदै गरेको सु प्र प्र ०२(००१ ख १३३२ नम्बरको बस दुर्घटनामा परेको प्रहरीले जानकारी दिएको छ । बस अनियन्त्रित भएर दुर्घटनामा परेको र सडक किनारमा कोल्टे परेकाले ठुलो क्षति हुनबाट बचेको प्रहरीले जनाएको छ ।

दुर्घटनामा १० जना घाइते भएको र उनीहरुलाई उपचारका लागि चितवनका अस्पतालमा भर्ना गरिएको छ । बस अनियन्त्रित भएर दुर्घटना भएको प्रहरीले जनाएको छ । प्रहरीका अनुसार आइतवार बिहान सवा सात बजेको समयमा भएको उक्त दुर्घटनाका क्रममा बस सडकको दाहिनेतर्फको डिभाइडरमा ठोक्किएको थियो । दुर्घटनापछि केही समय एकतर्फी रुपमा सञ्चालनमा आएको सडक अहिले भने पूर्ण रुपमा सञ्चालनमा आएको प्रहरीले जनाएको छ ।