काठमाडौं– आज भदौ १० गते सोमवार अर्थात अगष्ट २६ तारिख, देशैभरी श्रीकृष्ण जन्माष्टमी पर्व भगवान श्रीकृष्णको पूजा–आराधना गरी मनाइँदै छ । आजको दिन देशभरिका कृष्ण मन्दिरमा पूजा–आराधना, प्रवचन, भजनकीर्तन गर्नाका साथै व्रत बसी रातभरि जाग्राम बस्ने प्रचलन छ । यस पर्वका अवसरमा आज सरकारले सार्वजनिक बिदा दिइएको छ । जन्माष्टमीका दिन पाटनको मंगलबजारस्थित प्रसिद्ध कृष्ण मन्दिरमा ठूलो मेला लागेको छ । काठमाडौंको उत्तरपूर्वी भेगस्थित कागेश्वरी मनोहरा नगरपालिका–८ मा रहेको नवतनधाममा पनि भक्तजनको भीड लागेको छ ।

उत्तरी भेगस्थित बूढानीलकण्ठमा रहेको श्रीकृष्ण भावनामृत सङ्घको कार्यालयमा रहेको कृष्ण मन्दिरमा पनि भक्तजनको भीड लागेको छ ।
यसै उपलक्ष्यमा काठमाडौंका विभिन्न धार्मिक संघसंस्थाद्वारा श्रीकृष्णको झाँकीसहित शोभायात्रा तथा रथयात्रा निकाल्ने तयारी छ । आज घर–घरदेखि विद्यालयसम्म बालबालिकाहरुलाई श्रीकृष्णको स्वरूपमा सिँगार्ने प्रचलन पनि छ । कतिपय विद्यालयहरुले हिजै बालबालिकाहरुलाई श्रीकृष्ण भगवानको रुपमा सजाएका तस्विरहरु सामाजिक सञ्जालमा शेयर गरेका छन् ।

विष्णुको आठौं अवतारका रूपमा श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएको विश्वास गरिन्छ । त्यसैले आजको दिनलाई ‘कृष्ण जन्माष्टमी’ र रातलाई ‘मोहरात्री’ भनिन्छ । श्रीकृष्णले आजीवन सत्यको पक्षमा रही सत्कर्मका लागि मानव समुदायलाई प्रेरित गरेको पौराणिक मान्यता छ ।